07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
ԵՄ-ն Ուկրաինային 18 մլրդ եվրո օգնություն կհատկացնի
Քաղաքականություն
16.12.2022 | 15:47
Եվրամիության պետությունների և կառավարությունների ղեկավարները հավանություն են տվել 2023 թվականին Ուկրաինային 18 միլիարդ եվրոյի չափով մակրոֆինանսական օգնության տրամադրմանը։ Այս մասին հայտարարել է ԵԽ նախագահ Շառլ Միշելը ԵՄ գագաթնաժողովի արդյունքներով մամուլի ասուլիսում, գրում է DW-ի ռուսական ծառայությունը։
Ավելի վաղ Ուկրաինայի նախագահ Վլադիմիր Զելենսկին տեսակապով դիմելով ԵՄ առաջնորդներին՝ Միշելին խնդրել էր, որ «Ուկրաինայի և ամբողջ Եվրոպայի համար խաղաղության համար պայքարը կախված չլինի ԵՄ որոշ անդամ երկրների միջև թյուրիմացություններից և վեճերից»:
«Միկրոտնտեսական աջակցության փաթեթները Ուկրաինայի համար նույնպես զենք են ազատության պաշտպանության համար, ինչպես և ՌԴ-ի դեմ ԵՄ պատժամիջոցների 9-րդ փաթեթը։ Դա մեր պաշտպանությունն է»,-ասել է Զելենսկին։
2023 թվականին Ուկրաինային օգնության նոր փաթեթ հատկացնելու մասին Եվրահանձնաժողովը հայտարարել էր նոյեմբերի սկզբին։ Դրանք 10 տարի արտոնյալ ժամկետով վարկեր են՝ երկրի հրատապ կարիքները ֆինանսավորելու և նրա կարևոր ենթակառուցվածքները վերականգնելու համար։ Դեկտեմբերի սկզբին այդ միջոցը հավանության էր արժանացել Եվրամիության խորհրդի կողմից։
Բացի այդ՝ գագաթնաժողովի մասնակիցները պայմանավորվել են «անհապաղ ակտիվացնել Ուկրաինային մարդասիրական և քաղաքացիական պաշտպանության աջակցության տրամադրումը», ինչպես նաև «օգնել վերականգնել Ուկրաինայի կարևոր ենթակառուցվածքները»:
Էմմա Չոբանյան
