ՀՀ-ում տաղանդների մեծ ներհոսք է եղել, բայց ԲՏ ոլորտը այնքան էլ բարձր մակարդակի վրա չէ․ Հակոբ Արշակյան․ ՏԵՍԱՆՅՈՒԹ

Մատենադարանում ընթանում է «Silicon Mountains 2022» միջազգային տեխնոլոգիական գագաթնաժողովը, որը նվիրված է թվային լուծումների կիրառմանը տնտեսության տարբեր ճյուղերում:

«Հայաստանում բարձր տեխնոլոգիական արդյունաբերության ոլորտը շարունակում է տնտեսության ամենաարագ զարգացող ճյուղը լինելու դիրքում մնալ։ Սրա մասին է վկայում նաև այն, որ տարածաշրջանային ճգնաժամի պայմաններում տաղանդների ներհոսքը հիմնականում եղավ հենց դեպի Հայաստան»,- գագաթաժողովում ելույթ ունենալով՝ այս մասին ընդգծեց ՀՀ ԱԺ փոխնախագահ Հակոբ Արշակյանը։

Նրա դիտարկմամբ՝ Հայաստանն իր առջև դրված խնդիրը՝ լինել տեխնոլոգիական կենտրոն և Հայաստանը ներկայացնել միջազգային ասպարեզներում՝ որպես բարձր տեխնոլոգիական երկիր, թեև ոչ ամբողջապես, բայց գոնե տարածաշրջանային ձևաչափով կարողանում է կատարել։
«Այնուամենայնիվ, առկա պայմաններում, երբ բզմաթիվ երկրներ մրցավազքի մեջ են, այնքան էլ հեշտ չէ տեխնոլոգիական երկիր լինելը, անհրաժեշտ է սա որպես մարտահրավեր ընդունել և շարունակել այս ուղղությամբ մեծ ջանքեր գործադրել։

Պետք է խոստովանել, որ Հայաստանում որքան էլ բարձր տեխնոլոգիաների ոլորտն առաջատարն է իր աճի տեմպերով, այնուամենայնիվ դրանց կիրառումը թե՛ հասարակության շրջանում, թե՛ բիզնես ոլորտում դեռևս բարձր մակարդակի չէ»,- նշեց Արշակյանը։

ԱԺ փոխխոսնակն անդրադառնալով բարձր տեխնոլոգիական արդյունաբերության, գիտության, կրթության և տնտեսության կապի կարևորությանը՝ նշեց. «Գիտություն, կրթություն, արդյունաբերություն և տնտեսություն կապն անհրաժեշտ է բերել ֆունդամենտալ նոր մակարդակի վրա, և սա պիտի լինի Հայաստանի գիտատեխնոլոգիական նոր թռիչք ապահովելու ապագայի մասին մեր խոսակցությունը»: Արշակյանի համոզմամբ՝ գիտությունը, տնտեսությունը, արդյունաբերությունն ու կրթությունը պետք է իրենց ծրագրերով համահունչ լինեն և ծառայեն նույն նպատակներին:

Մանրամասները՝ տեսանյութում։