Ֆիլիպ Ռիքերը Հայաստան-Ադրբեջան բանակցություններում առաջընթաց է տեսնում

ԱՄՆ պետքարտուղարության կովկասյան բանակցությունների հարցերով ավագ խորհրդական,ԵԱՀԿ Մինսկի խմբի ամերիկացի համանախագահ Ֆիլիպ Ռիքերը Բաքվում ԱՄՆ դեսպանատնից տեսաուղերձ է հղել։ Դրանում նա մասնավորապես նշում է, որ ուրախ էր վերադառնալ Բաքու։ Ռիքերն ասել է, որ Ադրբեջանը ներուժ ունի և ամեն անգամ վերադառնալիս տեսնում է տնտեսության աճը և հնարավորությունները ամբողջ Հարավային Կովկասի համար։

«Պետքարտուղար Բլինքենը հավատում է խաղաղության հնարավորությանը և Հարավային Կովկասի ներուժին։ Գիտակցելով աշխարհագրության կարևորությունը՝ նա խնդրեց ինձ այցելել այս տարածաշրջան: Հիմա Բաքվում եմ, այստեղից գնալու եմ Թբիլիսի ու Երևան։ Այս տարածաշրջանում հանդիպում են աշխարհագրությունն ու պատմությունը։

Գիտենք, որ խաղաղության գործընթացը հեշտ չէ։ Ես գիտեմ, որ հակամարտությունը տառապանք է պատճառել երկու կողմերին։ Բայց հավատում եմ խաղաղ ապագայի հույսին։ Հույս կա խաղաղ ապագայի։ Խաղաղ բանակցությունների ընթացքում ձեռք բերված թափը կարող է պահպանվել և պատմության նոր էջ բացել՝ ավելի պայծառ ապագա երաշխավորելու համար: Ես տեսնում եմ իրական քայլեր երկու երկրների կողմից, որոնք կարող են հասնել կայուն խաղաղության»,-ասել է Ռիքերը։

Նա նաև նշել է, որ ԱՄՆ-ն աջակցում է Հայաստանի ու Ադրբեջանի միջև ուղիղ երկխոսությանը։ Ըստ Ռիքերի՝  կա իրական առաջընթաց։ Նա հավելել է, որ ողջունում է համարձակությունը, վճռականությունը, առաջնորդությունը խաղաղության հասնելու հարցում։

Հիշեցնենք, որ ավելի վաղ Ռիքերը հանդիպել էր Ադրբեջանի նախագահ Իլհամ Ալիևի ու ԱԳ նախարար Ջեյհուն Բայրամովի հետ։

Էմմա Չոբանյան