Բրյուսելյան հանդիպումը լինելու է, Ադրբեջանը չի կարող արհամարհել ԱՄՆ-ի և ԵՄ-ի կարծիքը․ Արմեն Հովհաննիսյան․ ՏԵՍԱՆՅՈւԹ

Հայաստանի և Ադրբեջանի ղեկավարների դեկտեմբերի 7-ին Բրուսելում նախատեսված հանդիպումը, ըստ քաղաքական վերլուծաբան Արմեն Հովհաննիսյանի, այդուհանդերձ տեղի կունենա։  Factor TV-ի հետ հարցազրույցում Հովհաննիսյանը կարծիք է հայտնում, որ օրը, գուցե, փոխվի, բայց հանդիպումը ամեն դեպքում տեղի կունենա։  Օրերս Իլհամ Ալիևը հայտարարել էր, թե Բրյուսելում դեկտեմբերի 7-ին նախատեսված հանդիպումը տեղի չի ունենա, քանի որ, ըստ Բաքվի, Հայաստանի վարչապետը առաջ է քաշում այդ հանիպմանը Ֆրանսիայի նախագահ Էմանուել Մակրոնի պարտադիր մասնակցության հարցը։

«Դա նշանակում է, որ հանդիպումը տեղի չի ունենա», – ասել էր Ադրբեջանի նախագահը՝ պնդելով, թե Ֆրանսիան հակաադրբեջանական կողմնակալ դիրքորոշման պատճառով չի կարող մասնակցել հայ-ադրբեջանական խաղաղության գործընթացին: Այս հայտարարությանն ի պատասխան երեկ Հայաստանի արտաքին գործերի նախարարն ասել է, որ Պահայում տեղի ունեցած քառակողմ հանդիպման ժամանակ պայմանավորվածություն էր ձեռք բերվել հաջորդ հանդիպման վերաբերյալ, և հայկական կողմը շարունակում է հավատարիմ մնալ այդ պայմանավորվածությանը։

«Ադրբեջանը համաձայնել է հաջորդ հանդիպմանը։ Հայաստանի և Ադրբեջանի վրա ճնշում կա, որ պարտադիր հանդիպեն։ Քառակողմ ձևաչափը լիովին բավարարում է Միացյալ նահանգներին, որը ցույց է տալիս՝ քառակողմ հանդիպումների հետևում որպես հինգերորդ կողմ ինքն է»,- ասում է քաղաքական վերլուծաբանը։ Արմեն Հովհաննիսյանը կարծում է, որ Ադրբեջանը չի կարող արհամարել ԱՄՆ-ի և Եվրամիության կարծիքը։

Մանրամասները՝ տեսանյութում։

Շողիկ Գալստյան