30.10.2026 | 12:42
Ըմբշամարտի ԱԱ. Արսեն Հարությունյանը և Արման Անդրեասյանը պարտվեցին
Միջոլորտային գիտաժողով` «Հակամանրէային դեղեր» խորագրով
26.11.2022 | 19:50
Նոյեմբերի 18-ից մեկնարկած Հակամանրէային կայունության հիմնախնդրի վերաբերյալ իրազեկման համաշխարհային շաբաթն ամփոփվեց «Հակամանրէային դեղեր» խորագրով միջոլորտային երկօրյա գիտաժողովի անցկացմամբ: Այս մասին հայտնում են առողջապահության նախարարությունից։
Մեկ հարկի տակ համախմբված առողջապահական ոլորտի, գյուղատնտեսության և սննդի անվտանգության առաջատար մասնագետները, ինչպես նաև ԱՆ խորհրդատուներն անդրադարձել են հակամանրէային դեղերի ոչ պատշաճ կիրառմանը` ընդգծելով, որ անհրաժեշտ է միավորել բոլոր ուժերը դեղակայունության դեմ պայքարում և ձեռնարկել համալիր միջոցառումներ՝ ուղղված համաճարակաբանական հսկողության և վարակների կանխման ապահովմանը:
«Այսօրվա գիտաժողովի կազմակերպումն անհրաժեշտ և կարևոր քայլ է ոչ միայն հասկանալու հակամանրէային դեղերի կայունության խնդիրը, այլև ջանքեր գործադրելու` բացթողումները շտկելու, ինչպես նաև գիտական ու գործնական հարթության արդի մարտահրավերներն ուսումնասիրելու և համապատասխան միջոցներ ձեռնարկելու ուղղությամբ: Հակամանրէային դեղերի նկատմամբ կայունությունն աճում է, իսկ ստեղծվող նոր հակամանրէային դեղերի թիվը շատ սահմանափակ է»,- նշել է առողջապահության նախարարի տեղակալ Արմեն Նազարյանը` հավելելով, որ լրջագույն այս խնդրի հետևանքով մի շարք հիվանդությունների բուժումը կարող է բարդանալ, երբեմն նաև` անհնարին դառնալ:
Հակամանրէային (հակաբակտերիային, հակասնկային, հակավիրուսային, հակամակաբուծային) դեղերի հայտնագործումը մարդկության պատմության մեջ երբևէ արձանագրված առողջապահության կարևորագույն առաջընթացներից է, ուստի հակամանրէային դեղերը կարևոր և արժեքավոր ռեսուրսն են, և դրանց ոչ պատշաճ օգտագործումը նպաստում է դրանց նկատմամբ կայուն մանրէների առաջացմանը, որի արդյունքում դեղերի արդյունավետությունը նվազում է, անհրաժեշտություն է առաջանում կիրառել նոր սերնդի թանկարժեք դեղեր, մեծանում է կողմնակի երևույթների դրսևորման հաճախականությունը, երկարում է բուժման ընթացքը` մեծամասամբ պահանջելով հիվանդանոցային պայմաններ:
Նշենք, որ գիտաժողովը կազմակերպվել է առողջապահության, էկոնոմիկայի նախարարությունների, Սննդամթերքի անվտանգության տեսչական մարմնի Առողջապահության համաշխարհային կազմակերպության, ՄԱԿ-ի պարենի և գյուղատնտեսության կազմակերպության, ՄեդՊրոգրես առողջապահական հիմնադրամի համատեղ ջանքերով, որի շրջանակներում ելույթներ են ունեցել նշված ոլորտների պատասխանատուներն ու մասնագետները:
