«Եթե մենք չհեռացնենք, 54 հոգին էլ կմնա խմբակցությունում». Վահրամ Բաղդասարյան. ՏԵՍԱՆՅՈՒԹ

Հանրապետականը խորհրդարանում ընդդիմություն է լինելու իր գաղափարական թևով: Այսօր ԱԺ ՀՀԿ խմբակցության ղեկավար Վահրամ Բաղդասարյանը տեղեկացրել է, որ գործարար թևի հանրապետականում մնալը որոշելու են իրենք՝ գործարարները: «Բիզնեսի մարդկանց այսինքն՝ ոչ քաղաքական թևին, մենք ասել ենք, որ եթե կլինեն խանգարող հանգամանքներ, ազատ են, մենք որևէ մեկից կառչած չենք, կարող են գնալ»,-ասել է խմբակցության ղեկավարը:

Պարոն Բաղդասարյանն ակնարկում է, որ Ֆելիքս Ցոլակյանի՝ խմբակցությունից դուրս գալու դիմում գրելը բոլորովին այլ նախապատմություն ունի՝ պարոն Ցոլակյանը չէր ուզում դուրս գալ: «Ֆելիքս Ցոլակյանը, երբ որ հարցը դրված է եղել հեռացման, ինքն է խնդրել, որ մնա խմբակցությունում»,- տեղեկացրել է պատգամավորը:

Կուսակցությունից կամ խմբակցությունից հեռացողների արարքը Վահրամ Բաղդասարյանը ցավագին չի ընդունում՝ ինքը հասկանում է, որ ընդդիմություն դարձած քաղաքական ուժը չի կարող մեծամասնություն լինել խորհրդարանում: Բայց կարող են մնալ նաև մեծամասնություն: «Եթե մինչ այդ չստիպենք, 54 հոգի էլ կմնան: Եթե չստիպենք, որ գնան»,- հայտարարել է պարոն Բաղդասարյանը:

Այսօր նա խոստովանում է, թե ինչպես է Հանրապետականը դարձել խոշոր կուսակցություն՝ որոշ մարդիկ պարզապես զուտ սեփական շահերի համար, առանց գաղափարական համոզմունքների մտել են կուսակցություն և դարձել պատգամավոր: «Եթե մարդիկ քաղաքական չեն, նրանց համար կարևորվել է երևի մանդատի իրողությունը, որ մանդատ ունենան»,- պարզաբանել է նա:

Վահրամ Բաղդասարյանն այսօր նաև ակնարկում էր, որ կառավարության քմահաճույքով չի որոշվելու, թե երբ պետք է անցկացվեն խորհրդարանի արտահերթ ընտրությունները, նախ պետք է Ընտրական օրենսգիրք փոխեն, այդ քննարկումներին պետք է մասնակցել հասարակական կազմակերպություններն ու դեսպանները: «Որից հետո եթե լինում է կոնսենսուս, դիմում ենք Վենետիկի հանձնաժողով, ԵԱՀԿ ԺՀՄԻԳ-ի մոնիթորինգի հանձնաժողովին, նրանք ուսումնասիրելուց հետո ժամանակացույց են մշակում, որից հետո խոսում ենք ժամկետներից»,- թվարկել է պատգամավորը:

Պարոն Բաղդասարյանը զգուշացնում է, որ խորհրդարանում կառավարության ծրագրի անցկացմանը խոչընդոտելու դեպքում, այնպես չէ, որ անմիջապես հետո նշանակվելու են արտահերթ խորհրդարանի ընտրություններ: Ինքն ընդհանրապես չի սպասում, որ գործադիրն ամեն ինչ կանի ծրագիրը տապալելու համար. «Գործադիրը մի մարդու նման կներկայանա, կգա, մենք էլ ծրագիրը կքննարկենք և ամեն ինչ նորմալ կլինի»:

Մհեր Արշակյան