Ռուսական իշխանամետ լրատվականները սկսել են Ուկրաինայի հետ խաղաղության պայմանագրի մասին թեզն առաջ տանել

Ռուսական մամուլում սկսել են լուրեր շրջանառվել այն մասին, որ Արևմուտքը, այդ թվում՝ ԱՄՆ-ը, Կիևին կոչ են անում բանակցել ՌԴ-ի հետ։ Մասնավորապես, պետական ֆինանսավորում ունեցող Lenta կայքում «Արևմուտքում սկսել են քննարկել Ռուսաստանի և Ուկրաինայի միջև խաղաղության պայմանները» վերնագրով հոդված է հրապարակվել, որում, հղում կատարելով WSJ-ին, նշվում է, որ «Արևմտյան երկրները մասնավոր կերպով քննարկում են Ռուսաստանի և Ուկրաինայի միջև հնարավոր խաղաղության պայմանները»։

ՌԴ իշխանությունների կողմից ֆինանսավորվող ՏԱՍՍ լրատվական գործակալությունն էլ «ԱՄՆ-ն և ՆԱՏՕ-ն հնարավոր են համարում Ուկրաինայի հարցով բանակցությունները, եթե Կիևը գրավի Խերսոնը» վերտառությամբ հոդված է հրապարակվել։ Ռուսական պարբերականն իտալական La Repubblica-ին հղումով նշում է, որ ԱՄՆ-ը և ՆԱՏՕ-ն հնարավոր են համարում Ուկրաինայի հարցով խաղաղ բանակցությունները, եթե Կիևը հետ վերադարձնի Խերսոնը, որի համար մարտերը և՛ ռազմավարական, և՛ դիվանագիտական նշանակություն ունի։ ՏԱՍՍ-ի հրապարակման համաձայն՝ «La Repubblica»-ն գրում է, որ Վաշինգտոնն այս հարցում մշտական հաղորդակցության մեջ է Բրյուսելի ու նրա դաշնակիցների հետ, ինչպես նաև այս գաղափարն է սերմանում Ուկրաինայի իշխանություններին։

«Մոսկովսկիյ Կոմսոմոլեց»-ն էլ «Իսպանիայի արտգործնախարարը հայտարարել է Ռուսաստանի հետ երկխոսությանը վերադառնալու՝ Եվրոպայի պատրաստակամության մասին» վերտառությամբ հոդված է հրապարակել, որում նշվում է, որ Իսպանիայի արտգործնախարար Խոսե Մանուել Ալբարեսը հայտարարել է, թե եվրոպական երկրները պատրաստ են ցանկացած պահի վերադառնալ Ռուսաստանի հետ երկխոսության։ Ըստ հոդվածագրի՝ Ալբարեսը հույս է հայտնել, որ բանակցություններն ու դիվանագիտությունը կարող են ավելի մոտեցնել խաղաղությունն Ուկրաինայում:

Այս հրապարակումներին հետևել է ՌԴ նախագահի խոսնակ Դմիտրի Պեսկովի մեկնաբանությունն այն մասին, որ «Ռուսաստանը բաց է մնում Ուկրաինայի հետ բանակցությունների համար, սակայն դրանք այժմ անհնար են Կիևի մերժման պատճառով»։

Տաթև Ֆռանգյան