06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
2,5-ամյա երեխան վնասվածք է ստացել մանկապարտեզում․ մայրը մեղադրում է պատասխանատուներին․ ՏԵՍԱՆՅՈՒԹ
Հասարակություն
04.11.2022 | 21:08
2,5 տարեկան երեխան մանկապարտեզում կզակի հատվածում խորը պատռվածք է ստացել։ Ծնողն անփութության և անուշադրության մեջ է մեղադրում մանկապարտեզի պատասխանատուներին։ Այս մասին նա հայտնել էր ֆեյսբուքյան գրառմամբ։
Մայրը երեխային Սուրբ Աստվածամայր բժշկական կենտրոն է տեղափոխվել, կարեր դնելուց հրաժարվել է՝ մեծ սպիից խուսափելու համար։ Առաջին բուժօգնություն են ցուցաբերել ու տուն տարել երեխային։ Պահանջել է տեսախցիկների ձայնագրությունը, բայց նրան ասել են, որ դեպքը տեղի է ունեցել սանհանգույցում, որտեղ տեսախցիկ չկա։
Խոսքը Lollipop զարգացման և ժամանցի կենտրոնի մասին է։ Մասնավոր հիմունքներով գործող մանկապարտեզում հարցազրույց տալ հրաժարվեցին, բայց կադրից դուրս ասացին, որ անուշադրության ու անփութության վերաբերյալ իրենց ուղղված բոլոր մեղադրանքներն անհիմն են, իսկ դեպքը պատահական է եղել։ Ըստ պատասխանատուի՝ երեխան վազել է, որ փաթաթվի մյուս երեխային, վերջինը հետ է քաշվել, և տղան ընկել է՝ կզակը հարվածելով ջեռուցման մարտկոցի սուր մասին։ Դեպքից հետո մանկապարտեզսը վերադարձրել է երեխայի վարձն ու վճարել սպիի համար նշանակված դեղորայքի գումարը։
Դեպքից հետո ծնողը նաև հարցում է արել ԿԳՄՍՆ-ին, որտեղից ստացել է պատասխան, որ այդ մանկապարտեզը լիցենզավորված չէ։
Լիցենզավորման ենթակա գործունեություն իրականացնելն առանց լիցենզիայի ենթակա է վարչական պատասխանատվության, սահմանում է օրենքը։ Իսկ թե ինչո՞ւ է մանկապարտեզը 4 տարի գործունեություն ծավալում առանց լիցենզավորման և ո՞վ պետք է վերահսկի հարցին՝ ԿԳՄՍՆ-ից մեզ տեղեկացրեցին, որ մանկապարտեզների գործունեությունը համարվում է լիցենզավորման ենթակա գործունեության տեսակ, սակայն մինչև համապատասխան օրենքներում փոփոխություններ կատարելը նախադպրոցական տարիքի երեխաների զարգացման կենտրոնների կողմից իրականացվող ծրագրերը համարվում էին լրացուցիչ կրթական ծրագրեր և լիցենզավորման ենթակա կրթական գործունեության տեսակ չէին դիտարկվում:
2022 թվականի հունվարի 15-ից փոփոխություններն ուժի մեջ մտնելուց հետո նախադպրոցական կրթական ծրագրերը և նախադպրոցական ծառայությունները ենթակա են լիցենզավորման, վերջնաժամկետ է սահմանված 2022 թվականի դեկտեմբերի 30-ը, սակայն օրենքում նախատեսվում է փոփոխություն կատարել և երկարաձգել լիցենզավորման գործընթացի վերջնաժամկետը։
Չլիցենզավորված մանկապարտեզը նախարարության վերահսկողությունից դուրս է, հետևաբար, մինչև լիցենզավորման պարտադիր պահանջի ուժի մեջ մտնելը ծնողը, եթե կարևորություն է տալիս դրան, պետք է անձամբ հետևողական լինի և պարզի մանկապարտեզն ունի՞ լիցենզավորում, թե՞ ոչ։
Մանրամասները՝ տեսանյութում։
Սաթենիկ Հայրապետյան
