Չգա՛ք, ասեք՝ վայ, ժամանակ չկա, պետք է մեկ անձից գնում անենք. Փաշինյան․ ՏԵՍԱՆՅՈՒԹ

ԿԳՄՍ նախարարության 2022 թվականի բյուջեում 62 մլն դրամի վերաբաշխում կատարվեց, նաև մոտ 140 մլն դրամն ուղղվեց կառավարության պահուստային ֆոնդ:

Որոշման համաձայն՝ կապահովվեն ՀՀ Սյունիքի մարզի Կապան խոշորացված համայնքի գյուղական բնակավայրերից ընտրված 10 բնակավայրի 53 դպրոցի շենքային պայմանների բարելավման նախագծանախահաշվային փաստաթղթերի մշակումը և փորձաքննությունը:

«Մենք պայմանավորվել էինք, որ երբ այս դպրոցները կբացվեն, զուգահեռ ձեռք կբերվեն նոր՝ գործարանային արտադրության տրանսպորտային միջոցներ՝ երեխաներին տեղափոխելու համար։ Տրանսպորտայի միջոցների ձեռքբերում մեր ժամանակացույցի մեջ ունե՞նք, թե՞ չունենք, աշխատանք իրականացվո՞ւմ է այդ ուղղությամբ։ Ո՞վ գիտի այս հարցի պատասխանը»,- հետաքրքրվեց վարչապետ Նիկոլ Փաշինյանը

ՏԿԵ նախարար Գնել Սանոսյանը նշեց, որ դա բավական մեծ փաթեթ է, և ամեն ինչ նախատեսված է ըստ փուլերի իրականացնել։

«Ես կոնկրետ հարց եմ տալիս՝ դրանով մեկը զբաղվո՞ւմ է»,- հարցրեց Փաշինյանը։

«Ենթադրվում է, որ այդ տրանսպորտային միջոցները պետք է ունենան որակավորված վարորդներ, նրանք պետք է նոր ստանդարտի աշխատողներ լինեն՝ սկսած արտահագուստից։ Այսօրվանից պետք է հագուստի դիզայնի մրցույթ հայտարարել, պետք է հասկանալ, թե ոնց ենք այդ մարդկանց հրավիրում և ընդունում աշխատանքի, և այլն։ Փաթեթը ստեղծվել է, բայց զուգահեռ ճանապարհային քարտեզ ստեղծվե՞լ է, թե երբ պետք է սկսվի և երբ պետք է ավարտվի։ Փաթեթի մեջ մենք այդ ամեն ինչն ունե՞նք, թե՞ չունենք։ Ո՞վ գիտի պատասխանը։

«Կարծում եմ ունենք, աշխատանքային խումբ է աշխատում։ Բայց մեքենաների ձեռքբերումը երևի դեռ այդքան մոտիկ չէ՝ ըստ գրաֆիկի»,- նշեց Սանոսյանը։

«Չեմ ուզում, որ հետո գաք, ասեք՝ վայ, եկեք մեկ անձից գնում անենք, ժամանակ չեղավ մրցույթը հայտարարենք, որովհետև գնումների մասին օրենքը լավը չէ։ Պետք է պլանավորել, հստակ իմանալ այսօրվանից։ Հետո չգաք ասեք՝ ժամանակ չկա, 3 օր է մացել պետք է մեկ անձից գնում անենք»,- արձագանքեց Փաշինյանը։

Մանրամասները՝ տեսանյութում։