Հայաստանն ու Իրանը գազի և էլեկտրաէներգիայի համաձայնագիրը երկարաձգող հուշագիր են կնքել

Հայաստանն ու Իրանը փոխըմբռնման հուշագիր են ստորագրել էլեկտրաէներգետիկայի և գազի վերաբերյալ համաձայնագրի երկարաձգման վերաբերյալ։ Իրանական Մեհր գործակալության փոխանցմամբ՝ այս մասին հայտնել է Թեհրանում գտնվող ՀՀ վաչապետ Նիկոլ Փաշինյանը Իրանի նախագահի հետ մամուլի ասուլիսում։

Իրանի նախագահ Էբրահիմ Ռաիսին նշել է, որ Հայաստանի վարչապետի այցն Իրանի Իսլամական Հանրապետություն, անկասկած, բեկումնային է լինելու երկու երկրների զարգացման գործում։ Ըստ նրա՝ Իրանի կառավարության քաղաքականության օրակարգում է նման երկկողմ հանդիպումների անցկացումը՝ ուղղված Իրանի և Հայաստանի միջև տնտեսական, առևտրային և անվտանգության հարաբերությունների զարգացմանը։

Ռաիսին ասել է նաև, որ երկու երկրների առևտրաշրջանառությունն աճել է 43 տոկոսով և նպատակ կա այն մեծացնելն ու երեք միլիարդ դոլարի հասցնելը։ Նշելով, որ Կովկասյան տարածաշրջանը Իրանի պատմության, քաղաքակրթության և մշակույթի մի մասն է՝ Ռաիսին հայտարարել է, որ կովկասյան տարածաշրջանում զարգացումները, անվտանգությունն ու խաղաղությունը շատ կարևոր են Իրանի համար, և որ «տարածաշրջանում օտարների կողմից ցանկացած միջամտություն խնդրի լուծման փոխարեն խնդիրներ կստեղծի»։

Հայաստանի վարչապետն իր հերթին բարձր է գնահատել Ռաիսիի մոտեցումն Իրանի հայ համայնքի նկատմամբ։

Գնահատելով Իրանի սկզբունքային տեսակետները Կովկասյան տարածաշրջանում խաղաղության և անվտանգության վերաբերյալ՝ Փաշինյանն ասել է. «Ես պարոն Ռաիսիին տեղեկացրել եմ Սոչիում կայացած եռակողմ հանդիպման մասին և համաձայն եմ Իրանի նախագահի տեսակետների հետ տարածաշրջանում կայուն խաղաղության և անվտանգության հաստատման վերաբերյալ»։

Նա նաև հայտնել է, որ  Իրանի և Հայաստանի նախարարները փոխըմբռնման հուշագիր են ստորագրել էլեկտրաէներգիայի և գազի պայմանագրի երկարաձգման վերաբերյալ։ Բացի այդ, քննարկումներ են տեղի ունեցել էներգետիկայի, գյուղատնտեսության, ենթակառուցվածների և ջրային ռեսուրսների կառավարման վերաբերյալ։

Հայաստանի վարչապետը Իրանի նախագահին հրավիրել է Երևան՝ բանակցությունները շարունակելու։

Էմմա Չոբանյան