«Եթե չկատարվեն նախագահի խոստումները, մենք կանցնենք հաջորդ քայլերին». Արցախում ցույցերը շարունակվում են. ԼՈՒՍԱՆԿԱՐՆԵՐ

Արդեն երկրորդ օրն է Արցախի մայրաքաղաք Ստեփանակերտում լարված վիճակ է: ԱԱԾ աշխատակիցների և քաղաքացիների մասնակցությամբ ծեծկռտուքը դարձել է հանրային բողոքի առիթ: Ցուցարարներն այսօր առավոտյան 10:30-ին վերստին փակել են Ստեփանակերտի հիմնական` Ազատամարտիկների պողոտան: 

Ընդ որում, այսօր արդեն բողոքի ակցիային են միացել նաև Արցախի տարբեր համայնքների բնակիչներ: Երեկ Արցախի նախագահի Բակո Սահակյանի հետ հանդիպման ժամանակ ներկայացվել են բողոքի ակցիան նախաձեռնող խմբի պահանջները՝ բացի բանակից բոլոր ուժային կառույցների ղեկավարության հրաժարականն ու պատասխանատվության ենթարկելը:

«Նախագահը միանշանակ է ընդունել բոլոր այդ պահանջները և խոստացել ողջամիտ ժամկետում կատարել այդ պահանջները: Եթե չկատարվեն այս խոստումները, մենք կանցնենք հաջորդ քայլերին»,-Factor.am-ի հետ զրույցում ասաց երեկ Արցախի նախագահի հետ հանդիպման մասնակցած ակցիայի կազմակերպիչներից Գեղամ Գրիգորյանը:

Ի հակառակ Ավտոկայանի հարևանությամբ անցկացվող բողոքի ցույցի, պաստառներով մարդկանց բազմություն է հավաքվել նաև Ստեփանակերտի Վերածննդի հրապարակում` Արցախի Հանրապետության նախագահի նստավայրի դիմաց՝ հետևյալ գրություններով. «Դեմ ենք ոստիկանապետի հրաժարականին», «Մի՛ ընկեք մոլորությունների մեջ», «Մենք կիսելու բան չունենք» և այլն: Արցախի նախագահի նստավայրի դիմաց անցկացվող ակցիայի մասնակիցները հանդես են գալիս ի պաշտպանություն Արցախի իշխանությունների:

 Մանրամասները՝ տեսանյութում:  

Մարութ Վանյան. Ստեփանակերտ