20.12.2025 | 18:06
Ֆուտզալի միջազգային ընկերական մրցաշարի մասնակիցներից մեկը չի ժամանել Երևան
Մոսկվան դիմել է Երևանին՝ Հայաստան Զատուլինի և Սիմոնյանի մուտքի արգելքի պարզաբանման հարցով
Քաղաքականություն
27.10.2022 | 17:02
Ռուսաստանը դիվանագիտական ուղիներով դիմել է Երևանին՝ Հայաստան Կոնստանտին Զատուլինի և Մարգարիտա Սիմոնյանի մուտքի արգելքի հաստատման և պարզաբանման հարցով։ Այս մասին այսօր ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Զախարովան նշել է, որ ՌԴ ԱԳՆ-ն տարակուսանքով է ընդունել այդ հաղորդագրությունները։
«Մենք անմիջապես դիվանագիտական ուղիներով դիմեցինք այս հարցով հաստատման և պարզաբանման համար։ Ելնում ենք այն հանգամանքից, որ տեղեկության հաստատվելու դեպքում այս քայլը կհամարենք որպես ոչ բարեկամական և դաշնակցային հարաբերություններին չհամապատասխանող։ Արձագանքը կլինի պաշտոնական հաստատում ստանալուց հետո։ Նրանք (Զատուլինը և Սիմոնյանը) ավանդաբար հանդես են գալիս դաշնակցային կապերի համակողմանի զարգացման օգտին։ Նրանք հասարակական գործիչներ են։ Ես իսկապես չէի ցանկանա, որ այսօր արհեստական պատճառներ հորինվեն, երբ Արևմուտքը փորձում է սեպ խրել մեր և մեր դաշնակիցների միջև»,- ասել է Զախարովան։
Հիշեցնենք, որ ավելի վաղ Պետդումայի ԱՊՀ հարցերով հանձնաժողովի առաջին տեղակալ Կոնստանտին Զատուլինը հայտնել էր, որ պաշտոնական էլեկտրոնային փոստին Հայաստան ժամանելու «անցանկալիության» մասին նամակ է ստացել՝ ստորագրված ՀՀ Ազգային ժողովի արտաքին կապերի վարչություն պետ Տիգրան Սեյրանյանի կողմից։ Պատճառները Հայաստանին ուղղված հայտարարություններն էին, որոնք վնասում են Ռուսաստանի հետ բարեկամական և դաշնակցային հարաբերությունների զարգացմանը։ Դրանից հետո Russia Today-ի գլխավոր խմբագիր Մարգարիտա Սիմոնյանը նույնպես հայտարարել է, որ իրեն արգելել են մուտք գործել Հայաստան։
Տաթև Ֆռանգյան
