Արցախի ԱԺ ուժերը մեծ հանրահավաք կանեն․ Փաշինյանը՝ գյուղոլորտի անկման, աշխատատեղերի աճի մասին․ Լուրեր

• Արցախի Խորհրդարանի քաղաքական բոլոր ուժերի նախաձեռնությամբ՝ հոկտեմբերի 30-ին՝ ժամը 15:00-ին, տեղի կունենա Ազգային ժողովի արտահերթ նիստ և հանրահավաք՝ նվիրված Արցախի արժանապատիվ ու անվտանգ ապագային: Արցախի տեղեկատվական շտաբից հայտնել են, որ նիստն ուղիղ հեռարձակմամբ ցուցադրվելու է Ստեփանակերտի Վերածննդի հրապարակում միաժամանակ հրավիրված մեծ հանրահավաքի առջև։ Նիստից անմիջապես հետո ելույթները կշարունակվեն Վերածննդի հրապարակում հրավիրված հանրահավաքում:
• Կառավարության այսօրվա նիստին վարչապետ Նիկոլ Փաշինյանը հայտնել է, որ երկրում տնտեսական իրավիճակը լավ է, թվել է տնտեսության ճյուղերի աճի ցուցանիշները և ուշադրություն է հրավիրել, որ գյուղատնտեսության ոլորտում 0,7 տոկոս անկում կա։ Նա նշել է, որ իրենց ամենօրյա աշխատանքի կարևոր թեմաներից մեկը պետք է լինի գյուղատնտեսության արդյունավետության բարձրացումը։ Կառավարության ղեկավարը նաև նշել է, որ 2018 թվականից աշխատատեղերի ավելացման միտում կա, և սեպտեմբերին Հայաստանում 10 037 նոր աշխատատեղ է գրանցվել։
• ԿԳՄՍ նախարար Վահրամ Դումանյանը հայտարարել է, որ բուհերի շենքերը շարունակելու են գործել, բուհական ավանի կառուցման ծրագիրը դեռ քննարկումների փուլում է։ Նա նաև վստահեցրել է. «Չկա բուհերի շենքերի վաճառքի որևէ ծրագիր, որևիցե առևտրային ցանց, հյուրանոցային համալիր, գիշերային երևակայական մտքեր, որոնք ծագում են որոշ մարդկանց գլխում»:

Այս ժամի լուրերը՝ տեսանյութում։