Ղազախստանը պատրաստվում է մեծացնել ուրանի մատակարարումները՝ շրջանցելով Ռուսաստանը

Ղազախստանի ազգային ատոմային ընկերությունը (Կազատոմպրոմ) սկսել է աշխատել համաշխարհային շուկաներ ուրանի մատակարարման այլընտրանքային երթուղու հնարավորությունների մեծացման ուղղությամբ, եթե Սանկտ Պետերբուրգի նավահանգստով մատակարարումների ավանդական տարբերակը որևէ պատճառով անհասանելի լինի։ Այս մասին ասված է ընկերության կայքէջում հրապարակված հաշվետվության մեջ։

«Կազատոմպրոմ»-ն ընդունում է, որ մինչ օրս ռուսական տարբերակի հետ կապված խնդիրներ չկան։ Երրորդ եռամսյակի բոլոր առաքումները կատարվել և ուղարկվել են հաճախորդներին առանց որևէ խնդրի: Սակայն ապագայում արևմտյան երկրների պատժամիջոցների արդյունքում սահմանափակումների պատճառով կարող են առաջանալ անսպասելի խոչընդոտներ, և անհրաժեշտ կլինի ավելացնել արտահանումը՝ շրջանցելով Ռուսաստանը։

Այս առումով գնալով ավելի արդիական է դառնում Անդրկասպյան միջազգային տրանսպորտային երթուղին (ТМТМ), որը ընկերությունն օգտագործում է 2018 թվականից։ Ներկայում դրանով ուրանի փոխադրման քվոտան կազմում է 3,5 հազար տոննա։

Ղազախական ընկերությունն ակտիվորեն աշխատում է այն մեծացնելու ուղղությամբ՝ ակնկալելով, որ գործընկերները կարող են նախընտրել ապրանքներ ստանալ Վրաստանում։

Հուլիսի սկզբին Ղազախստանի նախագահ Կասիմ-Ժոմարտ Տոկաևը ռուսական երթուղու վրա տեղի ունեցած մի շարք վթարների ֆոնին կառավարությունից պահանջեց անհապաղ ուղիներ փնտրել համաշխարհային շուկա նավթ մատակարարելու համար՝ շրջանցելով ԵՏՄ գործընկերոջը։ Դրա համար հանրապետությունը նախատեսում է օգտագործել նույն ճանապարհը Կասպից ծովով։ Օգոստոսի վերջին Ղազախստանի էներգետիկայի նախարար Բոլատ Ակչուլակովը հաստատել էր, որ նավթի արտահանման եղանակի փոփոխությունը մնում է օրակարգում։

Տաթև Ֆռանգյան