Պաշտպանության նախարարի մամուլի քարտուղարը՝ Նախիջևանի կողմից ադրբեջանական դիրքերի առաջխաղացման մասին

Թուրքական լրատվամիջոցներն անդրադարձել են Նախիջևանի կողմից ադրբեջանական զինուժի դիրքերի առաջխաղացման մասին տեղեկություններին՝ նշելով, որ․ «ադրբեջանական բանակը 1683 մետր բարձրություն ունեցող Քըզըլքայա սարի վրա ռազմավարական դիրքեր է առել իր հսկողության տակ՝ վերահսկողություն հաստատելով 5 կիլոմետրանոց տարածքի վրա», երեկ էլ Factor.am-ի հետ զրույցում ԱԺ պատգամավոր, Վայոց ձորի նախկին մարզպետ Սերգեյ Բագրատյանը նշել էր, որ «Ադրբեջանցիները հույս ունեն վերահսկել Երևան-Գորիս մայրուղին»: Արդեն այսօր, անդրադառնալով այս տեղեկություններին, ՀՀ ՊՆ Դավիթ Տոնոյանն ասել էր, որ Հայաստանի պաշտպանության նախարարությունն ադրբեջանական ԶՈՒ-ի դիրքերի տեղափոխման հետ կապված որևէ մտահոգություն չունի։ Այնուհանդերձ՝ ինչու են թուրքական և ադրբեջանական աղբյուրները աղմկում և պնդում, որ ունեն լուրջ առաջխաղացում, և որ ադրբեջանական կողմը պատրաստվում է լայնածավալ հարձակման։ Այս հարցերի շուրջ պարզաբանումներ ստանալու նպատակով Factor.am-զրուցեց ՀՀ ՊՆ մամուլի խոսնակ Արծրուն Հովհաննիսյանի հետ, ով ևս վստահեցրեց, որ հայկական կողմը մտահոգվելու առիթ չունի։

-Ադրբեջանական կողմը իր սուվերեն տարածքում, պետականորեն ճանաչված սահմանների շրջանակներում, կատարել է որոշակի դիրքերի փոփոխություն, որոնք կարող են որոշակի տակտիկական իրավիճակում իրենց հնարավորությունները մեծացնել, բայց մեզ համար դա էական որևէ փոփոխություն չի տալիս, որովհետև իշխող շատ ուշատ բարձունքներ և դիրքեր մնում են հայկական կողմի ձեռքում։

-Պարոն Հովհաննիսյան, երեկ Աժ պատգամավոր, Վայոց ձորի նախկին մարզպետ Սերգեյ Բագրատյանը կարծիք էր հայտնել, որ դիրքային այդ փոփոխություններով Ադրբեջանը հույս ունի վերահսկել Երևան-Գորիս ավտոճանապարհը։ Ի՞նչ կասեք այդ առնչությամբ։

-Ես չգիտեմ, թե իրենք ինչ են ուզում անել, բայց մենք մարտունակ ենք և մեր առջև դրված խնդիրները ամբողջությամբ կատարում ենք։

-Իսկ ի՞նչ քայլեր են ձեռնարկվում հայկական կողմից՝ չեզոքացնելու համար, ինչպես Դուք նշեցիք, տակտիկական առումով ադրբեջանական կողմի հնարավորությունները մեծացնող այս փոփոխությունները:

-Ինչ քայլեր որ հնարավոր է, արվում են, ամեն ինչ չէ, որ պետք է բարձրաձայնել։

– Արդյոք ադրբեջանական դիրքերի այս փոփոխությունն է առիթ հանդիսացել ՀՀ ԶՈՒ գլխավոր շտաբի նախկին ղեկավար Մովսես Հակոբյանի՝ այլ աշխատանքի անցնելու համար, ինչպես պնդում են թուրքական կայքերը։

-Սա այնքան անհեթեթ պնդում է, որ անգամ չեմ ցանկանում մեկնաբանել։