Քաղաքականություն
25.10.2022 | 17:55
Չեխիան դարձել է Եվրամիության վեցերորդ երկիրը, որը փակել է իր սահմանները ռուսաստանցիների համար։ Հոկտեմբերի 25-ին ուժի մեջ է մտել տուրիստական շենգենյան վիզա ունեցող Ռուսաստանի քաղաքացիների՝ Չեխիա մուտքի արգելքը։ Չեխիայի արտաքին գործերի նախարար Յան Լիպավսկու խոսքով՝ այսուհետ ռուսաստանցիները Պրահայի միջազգային օդանավակայանով չեն կարողանա երկիր մուտք գործել զբոսաշրջության, սպորտի կամ մշակույթի նպատակով, գրում է DW-ի ռուսական ծառայությունը։
«Այն իրավիճակում, երբ ռուսական ռեժիմը ռմբակոծում է քաղաքացիական օբյեկտները, մենք չենք կարող աչք փակել դրա վրա», – մեջբերում է չեխական CTK գործակալությունը Լիպավսկու խոսքերը։
Ըստ պաշտոնյայի՝ կառավարությունը միաձայն որոշել է արգելել ռուսաստանցիների մուտքը տուրիստական շենգենյան վիզաներով։
Չեխիայի ԱԳՆ ղեկավարը նաև կոչ է արել հրաժարվել մոբիլիզացիայից փախչող ռուսաստանցիներին վիզա տրամադրելուց։ Չեխիայի նախագահ Միլոշ Զեմանը, սակայն, չի համաձայնել Լիպավսկու կարծիքին։
Հարցին՝ արդյո՞ք Չեխիան պետք է ընդունի ռուս փախստականներին՝ փորձելով խուսափել Ուկրաինայի դեմ պատերազմի ուղարկվելուց, Զեմանը պատասխանել է. «Միանշանակ՝ այո»: Նա ապաստան հայցող Ռուսաստանի Դաշնության քաղաքացիներին համեմատել է ուկրաինացի փախստականների հետ՝ ընդգծելով, որ ռուսաստանցիները վտանգ չեն ներկայացնում Չեխիայի անվտանգության համար։
Տաթև Ֆռանգյան
