26.11.2024 | 09:31
Դիլիջանի ոլորաններում ձյուն է տեղում
Ռուբինյան-Քըլըչ հանդիպման վերաբերյալ որևէ պայմանավորվածություն չկա․ ԱԳՆ խոսնակ
Քաղաքականություն
25.10.2022 | 18:32
Հայաստան-Թուրքիա կարգավորման գործընթացի հատուկ ներկայացուցիչների՝ առաջիկայում որևէ վայրում կամ ժամկետում հանդիպելու վերաբերյալ որևէ պայմանավորվածություն չկա: Factor.am-ին այս մասին հայտնեց ՀՀ ԱԳՆ խոսնակ Վահան Հունանյանը։
«Առաջիկայում նախատեսված է հանդիպում երկու երկրների համապատասխան գերատեսչությունների ներկայացուցիչների միջև սահմանին՝ քննարկելու համար հուլիսին ձեռք բերված երկու պայմանավորվածությունների իրագործումը։ Այդ պայմանավորվածություններն են ուղիղ ավիաբեռնափոխադրումների մեկնարկը և սահմանը երրորդ երկրների քաղաքացիների համար բացելը»,- նշեց ԱԳՆ խոսնակը։
Նշենք, որ թուրքական Sabah պարբերականն այսօր հոդված է հրապարակել Հայաստանի և Թուրքիայի հարաբերությունների կարգավորման հարցով երկխոսության մասին և, վկայակոչելով իր դիվանագիտական աղբյուրներին, նշել, որ գործընթացը դրական է ընթանում, և որ երկու երկրների հարաբերությունների կարգավորման հարցով հատուկ ներկայացուցիչների հաջորդ հանդիպումը կայանալու է Թուրքիայում։
«Հայտնի է դարձել, որ փորձագետների կոմիտեն շուտով կհանդիպի, որ նպաստի կարգավորման գործընթացի հատուկ ներկայացուցիչների՝ դեսպան Սերդար Քըլըչի և Հայաստանի խորհրդարանի փոխնախագահ Ռուբեն Ռուբինյանի հանդիպումներում ընդունված որոշումների լրացմանը։ Սպասվում է, որ հատուկ ներկայացուցիչների հաջորդ հանդիպումը կկայանա Թուրքիայում»,- գրում է լրատվամիջոցը։
Պարբերականի դիվանագիտական աղբյուրները նշել են նաև, որ եթե Հայաստանի և Ադրբեջանի միջև խաղաղության պայմանագիր ստորագրվի, ապա այն մեծ ազդեցություն կունենա ամբողջ տարածաշրջանի վրա։ Նշվում է, որ հայ-թուրքական սահմանը փակ լինելու պայմաններում այն հատել է 40 հազար տոննա ապրանք և 140 հազար մարդ, իսկ այսօր, բացման դեպքում, այդ ցուցանիշը կարող է աճել նվազագույնը 10 անգամ։
Թուրքական ԶԼՄ-ն գրում է, որ ամենալուրջ քայլը կլինի սահմանային առևտուրը։ Եթե սահմանները բացելու որոշում կայացվի, ապա Աքայա սահմանային անցակետը կարող է մեկ ամսվա ընթացքում շահագործվել։ Լրատվամիջոցի աղբյուրներն ասել են, որ Հայաստանի և Թուրքիայի միջև հարաբերությունների կարգավորումն ամբողջ տարածաշրջանում խաղաղության ուղի կհարթի։
Էմմա Չոբանյան
