Քաղաքականություն
25.10.2022 | 21:18
Եվրահանձնաժողովի ղեկավար Ուրսուլա ֆոն դեր Լեյենը հայտարարել է, որ Ուկրաինային ամսական մինչև 5 միլիարդ եվրո է անհրաժեշտ՝ միայն բյուջետային ծախսերը հոգալու համար, ներառյալ՝ աշխատավարձերը և կենսաթոշակները, գրում է BBC-ի ռուսական ծառայությունը։
Միաժամանակ, ԵՄ-ն պատրաստ է ամսական տրամադրել մոտ 1,5 միլիարդ եվրո (որը 2023 թվականին կկազմի շուրջ 18 միլիարդ եվրո)։ Ֆոն դեր Լեյենը հույսը դնում է ԱՄՆ-ի, այլ երկրների և միջազգային ֆինանսական հաստատությունների վրա, որոնք կօգնեն մնացյալ գումարի հարցում:
2022 թվականին ԵՄ-ն Ուկրաինային ֆինանսավորում է 19 միլիարդով, ասել է ԵՀ ղեկավարը Բեռլինում Ուկրաինայի վերականգնմանը նվիրված համաժողովում։ Նա ընդգծել է, որ աշխարհը չպետք է ժամանակ կորցնի և պետք է օգնի ուկրաինացիներին՝ վերականգնել իրենց երկիրը։
Բացելով համաժողովը՝ Գերմանիայի կանցլեր Օլաֆ Շոլցը հայտարարել է Ուկրաինային օգնելու «21-րդ դարի Մարշալի պլանի» մասին։
Միևնույն ժամանակ, Ուկրաինայի նախագահ Վլադիմիր Զելենսկին, խոսելով տեսակապի միջոցով, նշել է, որ Կիևը դեռևս չի ստացել 17 միլիարդ եվրոյից ոչ մի ցենտ Ուկրաինայի արագ վերականգնման ծրագրի (Fast Recovery Plan) իրականացման համար։
Տաթև Ֆռանգյան
