Բնապահպանության և ընդերքի տեսչական մարմնի աշխատակիցները հոկտեմբերի 22-ին վերահսկողական շրջայցի ընթացքում արձանագրել են սևահողի ապօրինի տեղափոխման դեպք։
Ինչպես հայտնում են ԲԸՏՄ-ից, Աշտարակ-Երևան ճանապարհին քաղաքացի Տ. Հ-ն «Մազ» մակնիշի բեռնատար ավտոմեքենայով ապօրինի տեղափոխել է շուրջ 12 խմ սևահող։
Բեռնատարի թափքում առկա սևահողն առգրավվել և հանձնվել է Կոտայքի մարզի Պռոշյան համայնքին։
Նշվում է, որ հարուցված վարչական վարույթի շրջանակում իրավախախտի նկատմամբ կկիրառվեն պատասխանատվության միջոցներ։ Խստացված վերահսկողական ստուգայցերը լինելու են շարունակական։
