Առաջին անգամ կտուգանենք, երկրորդ անգամ՝ կկասեցնենք․ փոխնախարարը՝ ածխածնային արտանետումների մասին․ ՏԵՍԱՆՅՈՒԹ

ԱԺ Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նիստում քննարկվող նախագծերի փաթեթը ներառում է նաև «Մթնոլորտային օդի պահպանության մասին» օրենքում փոփոխություն կատարելու մասին նախագծը։

«Փոփոխության անհրաժեշտությունը պայմանավորված է ոչ միայն միջազգային պարտավորությամբ, այլև արդիականացման անհրաժեշտությամբ»,- ներկայացնելով վերոնշյալ օրենքի նախագծում առաջարկվող փոփոխությունները՝ այս մասին հայտնեց ՀՀ շրջակա միջավայրի նախարարի տեղակալ Գայանե Գաբրիելյանը։

Օրենքը հիմնովին լրամշակվել է: Ավելացվել են մի շարք հասկացություններ, որոնք կիրառվում են այլ երկրներում օդի որակի գնահատման համար: Ավելացվել են նաև դրույթներ, կապված արտանետումների տեխնիկական նորմավորման, արտանետումների հաշվառման, լիազորությունների բաշխման և այլնի հետ:

Օրենսդրական փաթեթով վարչական պատասխանատվություն է նախատեսվում արտադրության կամ սպառման թափոնները թափոնների գործածության օբյեկտներում կամ հատուկ հատկացված տեղերում կամ չարտոնագրված աղբավայրերում այրելու համար:

«Նոր օրենսդրությամբ սահմանվելու է, թե որ ոլորտներն ինչպիսի արտանետումեր պետք է ունենան, որպեսզի չհատեն կրիտիկական շեմը։

Եվ եթե շարունակեն աշխատել օրենքի խախտումով, առաջին անգամ կտուգանենք, երկրորդ անգամ կկասեցնենք։ Այդ դեպքում զգոնությունը կավելանա»,- ասաց փոխնախարարը՝ խոսելով ածխածնային արտանետումների մասին։

Մանրամասները՝ տեսանյութում։