Երևանի վիճակը, մեղմ ասած, հուսադրող չէ․ արտանետումների վերաբերյալ խիստ նորմեր են պետք․ փոխնախարար․ ՏԵՍԱՆՅՈՒԹ

Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի նիստում քննարկվող նախագծերի փաթեթը ներառում է նաև «Մթնոլորտային օդի պահպանության մասին» օրենքում փոփոխություն կատարելու մասին նախագծը։

«Մթնոլորտային օդի պահպանության մասին» օրենքում 1994 թ. ի վեր առաջին անգամ է կատարվում փոփոխություն: Այս պահին փոփոխության անհրաժեշտությունը պայմանավորված է ոչ միայն միջազգային պարտավորությամբ, այլև արդիականացման անհրաժեշտությամբ»,- ներկայացնելով վերոնշյալ օրենքի նախագծում առաջարկվող փոփոխությունները՝ այս մասին հայտնեց ՀՀ շրջակա միջավայրի նախարարի տեղակալ Գայանե Գաբրիելյանը։

Օրենքը հիմնովին լրամշակվել է: Ավելացվել են մի շարք հասկացություններ, որոնք կիրառվում են այլ երկրներում օդի որակի գնահատման համար: Ավելացվել են նաև դրույթներ, կապված արտանետումների տեխնիկական նորմավորման, արտանետումների հաշվառման, լիազորությունների բաշխման և այլնի հետ:

Օրենսդրական փաթեթով վարչական պատասխանատվություն է նախատեսվում արտադրության կամ սպառման թափոնները թափոնների գործածության օբյեկտներում կամ հատուկ հատկացված տեղերում կամ չարտոնագրված աղբավայրերում այրելու համար:

Օրենսդրական կարգավորմամբ կներդաշնակեցվեն աշխարհում ընդունված և ներկայումս երկրում գործող օդի որակի գնահատման չափանիշները, արտանետումների սահմանափակման նպատակով և զարգացած երկրներում լայնորեն կիրառվող «լավագույն հասանելի տեխնոլոգիաների» ներդրման պահանջարկը: Այն ավելի արդյունավետ կդարձնի մթնոլորտային օդի պահպանության կառավարումը, և կնպաստի միջազգային պայմանագրերով ամրագրված պարտավորությունների պատշաճ կատարմանը:

Փոխնախարարի դիտարկմամբ՝ հաշվի առնելով շարժական և անշարժ օբյեկտներից արտանետումները և դրանց նկատմամբ իրականացվող վարչարարությանը, կարելի է ասել, որ Երևանի վիճակը, մեղմ ասած, հուսադրող չէ․ «Կարծում ենք, որ հասունացել է կիրառվող նորմերի խստացման և օրենքի պահանջի չկատարման դեպքում նաև գործունեության կասեցման ժամանակը»։

Գաբրիելյանի խոսքով՝ փաթեթի ընդունումը կնպաստի վտանգավոր նյութերի արտանետումների նվազեցմանը, ինչպես նաև մարդու առողջության և շրջակա միջավայրի վրա դրանց վնասակար ազդեցության կանխարգելմանը և անվտանգության ապահովմանը:

Մանրամասները՝ տեսանյութում։