Հեղուկ նյութի տաքացմամբ ծխախոտը ևս կհարկվի ակցիզային հարկով․ նախագիծ․ ՏԵՍԱՆՅՈՒԹ

Մեկնարկել է ԱԺ Տնտեսական հարցերի հանձնաժողովի նիստը։

ՀՀ ֆինանսների նախարարի տեղակալ Արման Պողոսյանի հավաստմամբ` օրենսդրական նոր նախաձեռնության ընդունմամբ կվերանայվեն ծխախոտի արտադրանք համարվող տարբեր ապրանքատեսակների ակցիզային հարկով հարկման մոտեցումները և կկարգավորվեն որոշ ապրանքների ներմուծումն ավելացված արժեքի հարկից ազատելու հետ կապված խնդիրները:

Գործող իրավակարգավորմամբ էլեկտրոնային ծխախոտի արտադրանքն (ԱՏԳ ԱԱ 2404 12 000 0 և 2404 19 000 ծածկագրեր) ակցիզային հարկով չհարկելու դեպքում նվազում են նաև այլ ծածկագրերին դասվող ծխախոտի արտադրանքի սպառման ծավալները, ինչը հանգեցնում է պետական բյուջեի եկամուտների նվազման:

Հարկային օրենսգրքում փոփոխություններով Կառավարությունն առաջարկում է, որ հեղուկ նյութի տաքացմամբ ծխախոտը ևս հարկվի ակցիզային հարկով։ Նախատեսվում է էլեկտրոնային ծխախոտը հարկել ակցիզային հարկով` 2022 թ. ընթացքում 1մլ համար` 50 դրամ, իսկ 2023 թ. ընթացքում 1 մլ համար` 55 դրամ, ինչպես նաև այդ ապրանքները դրոշմավորել դրոշմապիտակով, հավասարեցնել ԱՏԳ ԱԱ 2206 ծածկագրին դասվող սիդրի և նույն ծածկագրին դասվող խմիչքների ակցիզային հարկի դրույքաչափերը:

Առաջարկվում է նաև օրենքի 1-ին հոդվածով սահմանված ցանկից հանել ԱՏԳ ԱԱ 84 և 85 խմբերի ապրանքատեսակները, ավելացված արժեքի հարկից ազատել ԱՏԳ ԱԱ 1404 90 000 8 ծածկագրին դասվող ապրանքների ներմուծումը:

Նշվել է, որ Կառավարությանը կվերապահվի իրավասություն սահմանելու ՀՀ միջազգային պայմանագրերով նախատեսված հարկային արտոնությունների կիրառության կարգը:

Ըստ փոխնախարարի` էլեկտրոնային ծխախոտի օգտագործումը նույնպես վնաս է առողջությանը, որի մասին են փաստում մի շարք առողջապահական հետազոտություններ:

Մանրամասները՝ տեսանյութում։