Առավելագույն քաշը գերազանցող բեռներ փոխադրելու համար տուգանքի չափը կբարձրանա․ նախագիծ. ՏԵՍԱՆՅՈՒԹ

Մեկնարկել է ԱԺ Տնտեսական հարցերի հանձնաժողովի նիստը։ Քննարկվում է Վարչական իրավախախտումների վերաբերյալ Հայաստանի Հանրապետության օրենսգրքում փոփոխություն եւ լրացումներ կատարելու մասին նախագիծը, որի համաձայն՝ առավելագույն քաշը գերազանցող բեռներ փոխադրելու համար տուգանքի չափը կբարձրանա։

Ներկայացնելով նախագիծը՝ ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավարի պարտականությունները կատարող Արմեն Դանիելյանն նշեց․ «Նախագծով նախատեսվում է ընդհանուր օգտագործման պետական ավտոմոբիլային ճանապարհներով թույլատրելի առավելագույն զանգվածը գերազանցող ծանրաքարշ կամ մեկ սռնու վրա ընկնող բեռնվածքը գերազանցող տրանսպորտային միջոցներով երթևեկելու համար սահմանված պատասխանատվության միջոց 200 հազար դրամը փոխարինել և սահմանել մինչև 1 տոննա և ավել յուրաքանչյուր տոննայի համար 200 հազար դրամ։

Գործող կարգավորումներով՝ թույլատրելի զանգվածը կգերազանցվի 1 տոննայով, թե 5 տոննայով, պատասխանատվության միջձոցը նույնն է, չնայած ճանապարհին հասցվող վնասը անհամեմատ տարբեր է։ Նախատեսվում է իրավախախտմանը և ճանապարհին հասցված վնասին համապատասխան պատասխանատվության միջոց կիրառել։ Այսինքն՝ որքան շատ լինի բեռի քաշը, այնքան պատասխանատվության չափը մեծ է լինելու: Նախագծի նպատակն արդարացիությունն է, ինչպես նաև ճանապարհներին հասցվող վնասի նվազեցումը։

Նախագծով նաև սահմանվում է նոր կարգավորում, որով տեսչական մարմնի կողմից տրված կարգադրագիրը չկատարելու դեպքում կամ գործունեությունը խոչընդոտելու դեպքում ևս պատասխանատվության միջոց կկիրառվի՝ ֆիզիկական անձի համար՝ 150 հազար դրամ, իրավաբանական և պաշտոնատար անձի համար՝ 250 հազար դրամ»։

Մանրամասները՝ տեսանյութում։