29.04.2026 | 23:46
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Դատավոր Արուսյակ Ալեքսանյանի կալանավորման հարցով որոշումը կհրապարակվի վաղը
Հասարակություն
18.10.2022 | 22:22
Երևան քաղաքի ընդհանուր իրավասության դատարանը՝ նախագահությամբ դատավոր Ռազմիկ Մարիկյանի, քիչ առաջ հեռացել է առանձին սենյակ՝ դատավոր Արուսյակ Ալեքսանյանի խափանման միջոցի հարցով որոշում կայացնելու: Այս մասին Factor.am-ի հետ զրույցում ասաց դատավորի պաշտպան Երեմ Սարգսյանը: Որոշումը կհրապարակվի վաղը՝ հոկտեմբերի 19-ին, ժամը 12:00-ին:
Հիշեցնենք, որ դատավոր Ալեքսանյանին ԱԱԾ-ն մեղադրում է ակնհայտ անարդար դատական ակտ կայացնելու և պաշտոնեական լիազորություններն անցնելու մեջ: Վերջինս որոշել է գրավի դիմաց ազատ արձակել քրեական հեղինակություն համարվող Սերգեյ Գրիգորյանին, ով հայտնի է «Ֆազ» մականունով և փաստաբան Էրիկ Ալեքսանյանի պաշտպանյալն է:
Փաստաբան Ալեքսանյանին նույնպես վարույթի շրջանակներում մեղադրանք է առաջադրվել: Նրան մեղադրում են դատավոր Ալեքսանյանին պաշտոնեական լիազորություններն անցնելու հարցում օժանդակելու մեջ: Ըստ Էրիկ Ալեքսանյանի պաշտպանների՝ վերջինս ընդամենը միջնորդություն է ներկայացրել դատարան, որը քննել ու բավարարել է դատավոր Ալեքսանյանը:
Փաստաբանն ու դատավորն իրենց առաջադրված մեղադրանքները չեն ընդունում:
Էրիկ Ալեքսանյանի գործով դատավորը ևս առանձին սենյակ է հեռացել՝ որոշում կայացնելու, որը դեռևս չի հրապարակվել:
Նշենք, որ Արուսյակ Ալեքսանյանին ձերբակալելու ժամկետը շուրջ 30 րոպեից կլրանա, և նա ազատ կարձակվի մինչև կալանքի հարցով որոշման հրապարակումը:
Արաքս Մամուլյան
