27.07.2026 | 13:47
Ղազախստանը պատրաստ է ընդլայնել արդյունաբերական ապրանքների մատակարարումները Հայաստան
ԵԽԽՎ-ն բանաձև է պատրաստել ՌԴ-ում ռեժիմն ահաբեկչական ճանաչելու վերաբերյալ և առաջարկում է Ռուսաստանին հեռացնել ՄԱԿ-ի Անվտանգության խորհրդից
Քաղաքականություն
13.10.2022 | 17:37
Եվրախորհրդի խորհրդարանական վեհաժողովը (ԵԽԽՎ) մշակել է ՌԴ իշխանություններին ահաբեկչական ռեժիմ ճանաչելու և ՄԱԿ-ի Անվտանգության խորհրդին երկրի անդամակցությունն անօրինական դարձնելու մասին բանաձևի տեքստը։ Այս մասին գրում է BBC-ի ռուսական ծառայությունը։
Վեհաժողովի այսօրվա նիստում քննարկվել է փաստաթղթի բովանդակությունը, բանավեճի ընթացքում տեքստում կատարվել է շուրջ 14 փոփոխություն։ Նիստն ընթացել է ուղիղ հեռարձակմամբ։
Փոփոխություններից մեկը ռուսական ռեժիմին վերաբերող ձևակերպման մասին է։ Առաջին տարբերակում ձևակերպումը եղել է «Ռուսաստանի Դաշնության ռեժիմը», փոփոխությունից հետո փաստաթղթում մնացել է «այս պահին իշխանության մեջ գտնվող ռուսական ռեժիմը» ձևակերպմամբ։
Բանաձևի ընդունմանը կողմ է քվեարկել հանդիպման մասնակիցների ճնշող մեծամասնությունը։ Դատելով փորձագետների մեկնաբանություններից՝ սա կարելի է համարել առաջին քայլը Ռուսաստանը որպես ահաբեկչությանն աջակցող երկիր ճանաչման ճանապարհին։
ԵԽԽՎ-ն նաև կոչ է արել ստեղծել միջազգային տրիբունալ՝ Ուկրաինայի օկուպացված տարածքներում ռուսական հանցագործությունները և պատերազմի օրենքների ու սովորույթների խախտումները հետաքննելու համար։
ԵԽԽՎ պատգամավոր, լիտվացի քաղաքական գործիչ Էմանուելիս Զինգերիսը նաև կոչ է արել Վեհաժողովին անել հնարավոր ամեն ինչ՝ Ռուսաստանի տարածք բռնի ուժով տեղափոխված խաղաղ բնակիչներին Ուկրաինա վերադարձնելու համար։
Տաթև Ֆռանգյան
