14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
«Ես եվրոպացի եմ և հրաժարվում եմ ադրբեջանական գազի դիմաց ֆինանսավորել հայերի ջարդը»․ ֆլեշմոբ՝ Twitter-ում
Քաղաքականություն
12.10.2022 | 11:15
«Ես ֆրանսիացի եմ, ես շվեյցարացի եմ, ես բելգիացի եմ, ես կորսիկացի եմ, ես արգենտինացի եմ․․․․ ես եվրապացի եմ և հրաժարվում եմ ադրբեջանական գազի դիմաց ֆինանսավորել հայերի ջարդը․ #StandWithArmenia»․ թվիթեր սոցիալական ցանցում ֆլեշմոբ է մեկնարկել, որով մասնակիցներն իրենց դժգոհությունն են հայտնում Եվրոպա մատակարարվող ադրբեջանական գազի դիմաց Ադրբեջանի ԶՈՒ-ի կողմից հայ ռազմագերիների նկատմամբ իրականացված վայրագությունների նկատմամբ եվրոպական երկրների լռության դեմ։
Նշենք, որ երեկ տելեգրամյան ալիքներում հայ գերիներին խոշտանգելու նոր տեսանյութ էր տարածվել։ Մոտ 30 վայրկյան տևողությամբ կադրերում երեք արնաշաղախ զինծառայողներ են երևում, որոնցից մեկը, ըստ երևույթին, սպանված է, մյուս երկուսը՝ վիրավոր։ Իսկ ընդամենը շաբաթներ առաջ մեկ այլ տեսանյութ էր տարածվել, որում պատկերված էր հայ ռազմագերիների գնդակահարության պահը․ կադրերում 8-9 ռազմագերի էր երևում, որոնցից մի քանիսն արդեն նույնականացվել են։
Հիշեցնենք, որ Ուկրաինայի դեմ ՌԴ-ի սանձազերծած պատերազմից հետո Եվրոպան փորձում է ամբողջովին հրաժարվել ռուսական գազից, փոխարենը հայտնել է Ադրբեջանից գազի մատակարարումը կրկնապատկելու մասին: Եվրոպական հանձնաժողովի նախագահ Ուրսուլա ֆոն դեր Լեյենը և Ադրբեջանի նախագահ Իլհամ Ալիևը հուլիսի 18-ին փոխըմբռնման հուշագիր էին ստորագրել էներգետիկ ոլորտում ռազմավարական գործընկերության վերաբերյալ։
