Քաղաքականություն
11.10.2022 | 20:47Ուկրաինայի դեմ պատերազմ սկսելուց հետո հատկապես ՌԴ-ում սաստկացան հակաժողովրդավարական պրոցեսները՝ փակվեցին լրատվամիջոցներ, բանտարկվելու վախից հեռացան ընդդիմադիրներ և ազատ լրագրողներ։ Սակայն Պուտինի ռեժիմի ավտորիտար ձեռքը չշրջանցեց անգամ ՀՀ-ն, մասնավորապես՝ լրատվական դաշտը։
ՌԴ նախագահ Վլադիմիր Պուտինը չի բավարարվում իր երկրում անկախ լրատվամիջոցներին, քաղակտիվիստներին և ընդդիմադիրներին ճնշելով, բանտարկելով, և անցել է ՀՀ-ին։ Factor TV-ն օրերս պաշտոնական գրություն է ստացել «Ռոսկոմնադզոր»-ից՝ ՌԴ կապի, տեղեկատվական տեխնոլոգիաների և զանգվածային հաղորդակցության ոլորտի նկատմամբ վերահսկողության դաշնային ծառայությունից, որով ՌԴ իշխանությունները պահանջել են Factor TV-ից՝ հեռացնել ուկրաինական Բուչայի արյունալի դեպքերի հետ կապված ԵՄ-ի դատապարտման տեքստը։ Factor TV-ն չի պատրաստվում այս պահանջը կատարել, քանի որ անկախ ՀՀ-ի վրա չեն կարող ՌԴ օրենքները տարածվել, և ոչ ոք չի կարող լռեցնել լրատվամիջոցին՝ ներկայացնելու ճշմարտությունը, այդ թվում՝ ուկրաինական պատերազմի մասին։
Խոսքի ազատության պաշտպանության կոմիտեի նախագահ Աշոտ Մելիքյանը Factor TV-ին տված հարցազրույցում ասում է, որ ռուսական «Ռոսկոմնադզորի» կողմից Factor TV-ին գրաքննելու փորձը ռուսական ավտորիտարիզմի դրսևորում է։ Ըստ փորձագետի՝ Կրեմլի ավտորիտար բարքերը Հայաստան տեղափոխվելու վտանգ կա, և եթե ՌԴ-ն պատերազմի արդյունքում թուլանա, կթուլանա նաև այդ վտանգ, իսկ եթե ՌԴ-ն ուժեղանա պատերազմում, այդ վտանգն էլ կուժեղանա։
Անդրադառնալով հարցի քաղաքական ասպեկտին՝ Աշոտ Մելիքյանը նշում է, որ ՌԴ-ի ավտորիտար լծից պետությունները հոգնել են և փորձ են անում ազատվել ռուսական լծից, որը իր նախկին կայսրության մաս կազմող պետությունները մաս առ մաս «ծախում է»։ ՀՀ-ն բարդ իրավիճակում է և, ըստ փորձագետի, պետք է գործի առավել զգույշ և հաշվարկված։
Հարցազրույցն ամբողջությամբ՝ տեսանյութում։
Ռոբերտ Անանյան
