ՌԴ-ում «Մետա» ընկերությունն ու «Վեսնա» շարժումը ճանաչվել են ահաբեկչական

Ռուսաստանի իշխանություններն ամերիկյան Meta ընկերությունը ներառել են ահաբեկչության ու ծայրահեղականության մեջ ներգրավված կազմակերպությունների ցանկում։ Համապատասխան որոշումն ընդունել է Ռոսֆինմոնիթորինգը, գրում է DW-ի ռուսական ծառայությունը։

Օրենսդրության համաձայն՝ Ռուսաստանի բանկերը սառեցնում են այս ցուցակում ընդգրկված անձանց դրամական միջոցները և դադարեցնում ծառայությունները։

Meta-ին պատկանող Facebook և Instagram սոցիալական ցանցերի գործունեությունը Ռուսաստանում արգելվել էր այս տարվա մարտի 21-ին, Մոսկվայի Տվերսկոյի դատարանի որոշմամբ, ծայրահեղական գործունեություն ծավալելու մեղադրանքով։ Ի դեպ, WhatsApp-ի գործունեության վրա դատարանի որոշումը չէր տարածվել, քան որ այն, ըստ դատավորների, չի իրականացնում տեղեկատվության հանրային տարածում։

Բացի այդ, «Վեսնա» երիտասարդական դեմոկրատական շարժումը ևս ներառվել է ծայրահեղական ու ահաբեկչական ցուցակում։ Այն ստեղծվել է 2013 թվականին՝ Սանկտ Պետերբուրգի երիտասարդական «Յաբլոկոյի», «Պաշտպանության» և «Համերաշխության» միավորման արդյունքում։ Սեպտեմբերի վերջին Սանկտ Պետերբուրգի դատախազությունը հայց էր ներկայացրել դատարան՝ պահանջելով «Վեսնա»-ն ճանաչել ծայրահեղական շարժում և արգելել։ Այս հայցի վերաբերյալ դատարանի որոշումը դեռ չկա։

Ուկրաինայի դեմ ՌԴ պատերազմի մեկնարկից հետո շարժումը կոչ է արել ռուսաստանցիներին՝ դուրս գալ բողոքի ակցիաների։ ՌԴ-ում մասնակի մոբիլիզացիայի հայտարարումից հետո շարժումը նաև բողոքի ակցաներ էր կազմակերպել։

Էմմա Չոբանյան