Արյան, նոր ցեղասպանության կբերի ԼՂ-ի կարմիր գծի խախտումը․ ՀՀ-ն թող ճանաչի Ադրբեջանի սահմանները՝ առանց մեզ. Դավիթ Բաբայան․ ՏԵՍԱՆՅՈՒԹ

Գործարար Ռուբեն Վարդանյանին Արցախի նախագահն առաջարկեց պետնախարարի պաշտոնը։ Նա, հավանաբար, կընդունի առաջարկը։ Ո՞րն է այս առաջարկի նպատակը։ Factor TV-ին տված հարցազրույցում Արցախի Հանրապետության արտգործնախարար Դավիթ Բաբայանը չցանկացավ նախագահի փոխարեն հարցը մեկնաբանել, սակայն կարծիք հայտնեց՝ կարևոր է, որ Արցախը լինի հայության թիվ մեկ խնդիրը։

«Եթե Արցախի շենացման և զարգացման գործում դերակատարություն ունենան ազդեցիկ և կշիռ ունեցող հայեր, կարծում եմ՝ լավ կլինի, մեզ պետք են և՛ պրոֆեսիոնալներ, և՛ հայրենասերներ»,- ասաց Դավիթ Բաբայանը։

Վերջին շրջանում հանրայնորեն խոսք է գնում Ստեփանակերտի և Բաքվի միջև խոսակցության սկզբի մասին։ Այս միտքը հնչում է միջազգային հանդիպումներից և բանակցություններից հետո։ Երեկվա հեռախոսազրույցում Արարատ Միրզոյանը, Էնթոնի Բլինքենը և Ջեյհուն Բայրամովը, ի թիվս այլ հարցերի, մտքեր են փոխանակել ոչ միայն Հայաստան-Ադրբեջան խաղաղության պայմանագրի մշակման, այլև Ստեփանակերտի և Բաքվի միջև քննարկումների մեխանիզմ ստեղծելու վերաբերյալ: Նիկոլ Փաշինյանը ևս Ֆրանսիայում ասաց՝ Ադրբեջան-Լեռնային Ղարաբաղ քննարկումների մեկնարկը կարող է օգտակար լինել։

Դավիթ Բաբայանից հետաքրքրվեցինք՝ արդյո՞ք Ռուբեն Վարդանյանին պետնախարարի պաշտոնի համար հրավիրելն ունի նպատակ՝ նրան դարձնել Բաքվի հետ բանակցող, հատկապես, որ ինքն է ակնարկել այդ մասին։

«Ադրբեջանի հետ բանակցություններում անհատները կարող են ունենալ որոշ դերակատարություն, բայց սա աշխարհաքաղաքական խնդիր է, հատկապես, որ Ադրբեջանը խուսափում է Արցախի հետ ուղիղ երկխոսությունից։ Դժվար թե շատ շուտ իր դիրքորոշումը փոխի, հատկապես, եթե այդ երկխոսությունը պետք է լինի հավասարը հավասարի հետ։ Երբ մենք անդրադառնում ենք Ստեփանակերտ-Բաքու երկխոսությանը և դա քննարկվում է տարբեր հարթակներում, այստեղ կան և դրական միտումներ, և մի շարք ճշտման ենթակա հարցեր»,- նշեց արցախցի պաշտոնյան։

Որպես դրական միտում՝ Դավիթ Բաբայանը համարում է այն, որ այդպիսի երկխոսությունն ուղղակի, թե անուղղակի կընդգծի Արցախի սուբյեկտայնությունը։ Սակայն կան նաև ճշգրտման ենթակա հարցեր․ «Ստեփանակերտը երբեք չի հրաժարվել Բաքվի հետ երկխոսությունից, բայց մենք կարևորել ենք հետևյալը՝ պետք է առաջին հերթին վերականգնվի բանակցային լիարժեք ձևաչափը, որն ընդունել է ԵԱՀԿ-ն 1994 թվականի Լիսաբոնյան հիմնադիր գագաթնաժողովի ընթացքում, և կան հարակից մի շարք փաստաթղթեր՝ 1995-96-ին ընդունված։ Սա միջազգայնացված մոտեցում է՝ Արցախը հանդիսանում է և՛ հակամարտության, և՛ բանակցությունների կողմ։ Պետք է վերականգնվի այս ձևաչափը։ Եթե կա արդեն իսկ գոյություն ունեցող ձևաչափ, ես չեմ կարծում, որ ճիշտ է այն տապալելը։ Հակառակը՝ պետք է մեկը մյուսին լրացնել, վերականգնել այդ ձևաչափը և այդ գործընթացի ներքո շարունակել բանակցությունները»։

Արցախի արտգործնախարարը նախընտրելի է համարում և՛ Ստեփանակերտ-Բաքու ուղիղ շփումը, և՛ այլ մասնակիցների ներգրավմամբ՝ Հայաստանի, Ֆրանսիայի, ՌԴ, ԱՄՆ։

«Ցանկալի է, որ դա լինի միջազգայնորեն ճանաչված և հաստատված ձևաչափի հիման վրա»,- հայտարարեց Դավիթ Բաբայանը։

Հարցազրույցն ամբողջությամբ՝ տեսանյութում։

Ռոբերտ Անանյան