Կառուցապատող ընկերություններին տրվող լիցենզիաների տարբերակում կդրվի․ 3 մակարդակի տուրք կսահմանվի․ ՏԵՍԱՆՅՈՒԹ

Քաղաքաշինության ոլորտի կազմակերպություններին միատեսակ լիցենզիա չի տրվելու: Այս մասին հայտնել է ՀՀ քաղաքաշինության կոմիտեի նախագահի տեղակալ Դավիթ Գրիգորյանը հոկտեմբերի 4-ին գումարված ԱԺ հերթական նիստի ընթացքում՝ ներկայացնելով Կառավարության հեղինակած «Լիցենզավորման մասին», «Պետական տուրքի մասին», «Քաղաքաշինության մասին», «Քաղաքաշինության բնագավառում իրավախախտումների համար պատասխանատվության մասին» օրենքներում լրացումներ կատարելու մասին նախագծերի փաթեթը:

Ըստ գործող կարգավորումների՝ անկախ քաղաքաշինական օբյեկտի բարդությունից և ծավալից, բոլորին տրվում է կառուցման, նախագծման, տեխնիկական հսկողության նույն լիցենզիան՝ նույն իրավունքներով:

Ներկայացված նախագծով քաղաքաշինական օբյեկտների ռիսկայնության աստիճանից կախված՝ դասակարգելու են այդ սուբյեկտները՝ ըստ դասերի և փորձառության, ըստ մասնագետների կազմի:

Ըստ այդմ, օրենսդրական նախագծով առաջարկվում է սահմանել լիցենզիայի տեսակները:

ՀՀ քաղաքաշինության կոմիտեի նախագահի տեղակալի խոսքով՝ կստեղծվի լիցենզավորված կազմակերպությունների միասնական ռեգիստր՝ թվային գրանցամատյաններով, որում կհավաքվի բոլոր կազմակերպությունների մասին տեղեկատվությունը:

Օրենսդրական փոփոխությամբ քաղաքաշինական ոլորտի մասնագետները կունենան շարունակական մասնագիտացման զարգացման, կատարելագործման հնարավորություն:

ՀՀ ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը, կարևորելով ներկայացված օրենսդրական փաթեթը, նշեց, որ նախագիծը ենթադրում է կոնցեպտուալ փոփոխություն: Նրա խոսքով՝ նախաձեռնությունն անցել է երկար քննարկման փուլ:

Բաբկեն Թունյանն ընդգծեց, որ գործող կարգավորմամբ հաշվի չի առնվում ռիսկայնության, բարդության աստիճանը և բոլորին տրվում է միատեսակ լիցենզիա, վճարվում է միևնույն տուրքը: Նրա տեղեկացմամբ՝ ներկայացվող նախագծով դրվում է տարբերակում: 3 մակարդակի տուրք կսահմանվի։

Մանրամասները՝ տեսանյութում։