16.05.2026 | 17:02
Մայիսի 17-ից օդի ջերմաստիճանը կբարձրանա
Քոչարյանը՝ Տեր-Պետրոսյանի այն տեսակետի մասին, թե ով էլ գա, ավելի վատ փաստաթուղթ է ստորագրելու․ ՏԵՍԱՆՅՈՒԹ
Քաղաքականություն
28.09.2022 | 17:07
«Դա Լևոն Տեր-Պետրոսյանի մոտեցումն է, և նման մոտեցում նա ունեցել է դեռ 1992 թվականին»,-այս մասին այսօր հրավիրված ասուլիսում նշեց ՀՀ երկրորդ նախագահ Ռոբերտ Քոչարյանը՝ անդրադառնալով դիտարկմանը, որ Լևոն Տեր-Պետրոսյանն իր հարցազրույցում ասել է, թե երեք նախագահներն, ըստ էության, չգիտեն, թե Նիկոլ Փաշինյանն ինչ է խոստացել մյուս երկրների ղեկավարներին, բայց և կապիտուլիացիան անխոսափելի է, և ով էլ գա, ավելի վատ փաստաթուղթ է ստորագրելու։
«Երբեք չեմ համարել , որ լինում են անհույս վիճակներ, երբ միայն պայքարողի համար է դուռ բացվում ։ Կտրականապես համաձայն չեմ այդ գնահատականների հետ ։ Այո՛ վիճակը ծանր է, կան բազմաթիվ պրոբլեմներ, բայց դա չի նշանակում, որ այս վիճակում պետք է հանձնվենք ու ընդունենք այն պարտադրանքները, որ այսօր վարում են Հայաստանի նկատմամբ»,- ընդգծեց ՀՀ երկրորդ նախագահը՝ կրկնելով, որ կտրականապես համաձայն չէ Լևոն-Տեր Պետրոսյանի հայտնած այդ գնահատականների հետ։
Հիշեցնենք՝ օրեր առաջ՝ սեպտեմբերի 22-ին հանդիպում էր տեղի ունեցել Ն․Ս․Օ․Տ․Տ․ Գարեգին Երկրորդ ամենայն հայոց կաթողիկոսի և ՀՀ նախագահներ Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի, ինչպես նաև ԼՂՀ նախագահներ Արկադի Ղուկասյանի և Բակո Սահակյանի միջև, որի ընթացքում, ըստ հաղորդագրության՝ կայացել էր «շահագրգիռ քննարկում Հայաստանում ստեղծված իրավիճակի առնչությամբ և որոշում էր կայացվել շարունակել հանդիպումները»։
Ավելի վաղ՝ «Մոսկվա» կինոթատրոնի կարմիր դահլիճում Ռոբերտ Քոչարյանը փակ հանդիպում էր ունեցել իր մի խումբ համախոհների հետ։
Մանրամասները՝ տեսանյութում։
