16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Թուրքիան մենակ է այս խաղում․ Հունաստանի վարչապետը՝ Էրդողանին
Քաղաքականություն
28.09.2022 | 17:20
Թուրքիայի նախագահ Ռեջեփ Թայիփ Էրդողանը նախօրեին կրկին վերադարձել է հարձակողական գործողություններին՝ մեղադրելով Հունաստանին ահաբեկիչներին ապաստան տալու և արևելյան Էգեյան կղզիների «ծածկված օկուպացիայի» մեջ։ Ի պատասխան՝ Հունաստանի վարչապետ Կիրիակոս Միցոտակիսը մատնանշել է Թուրքիայի աճող մեկուսացումը և հորդորել նրան վերադառնալ «էական երկխոսության» ճանապարհին, գրում է ekathimerini-ն։
«Ինչ էլ Հունաստանն ունենար ասելու, ՄԱԿ-ում հստակ ասել է՝ թե՛ իր կարմիր գծերի, թե՛ թուրք ժողովրդի հանդեպ իր բարեկամական վերաբերմունքի մասին»,- ասել է Միցոտակիսը կառավարության նիստում՝ հավելելով, որ Անկարան կարող է շարունակել իր ստերն ու սպառնալիքները, սակայն նա մենակ է այդ խաղում։
Հունաստանի վարչապետը նշել է, որ Անկարան միայն Հունաստանի դեմ չի գնում, այլև Եվրոպայի ու ՆԱՏՕ-ի դաշնակիցների։
«Թող բորբոքված խոսքերի փոխարեն նրանք վերջապես ընտրեն խաղաղ գործողությունների և էական երկխոսության ուղին»,- ասել է Միցոտակիսը՝ նշելով, որ Հունաստանը մնում է հանգիստ իր դիրքորոշումներում։
Հիշեցնենք, որ նախօրեն Էրդողանը կրկին սպառնացել էր Հունաստանին։ Նա նշել էր, թե Հունաստանի կողմից կղզիներում, ինչպես նաև Թուրքիայի հետ ցամաքային սահմանին մոտ՝ Արևմտյան Թրակիայում զենքի տեղակայումն Անկարային չի վախեցնում, քանի որ «Թուրքիայի հզորությունը շատ ավելի մեծ է»։
«Միևնույն ժամանակ, ես ուզում եմ զգուշացնել հույն ժողովրդին երկրի քողարկված օկուպացիայի սպառնալիքի մասին։ Աթենքում խորապես սխալվում են՝ ենթադրելով, թե նրանց կփրկի ԱՄՆ-ից ու Եվրոպայի երկրներից աջակցությունը։ Չի՛ օգնի»,- ասել էր Թուրքիայի նախագահը։
Էմմա Չոբանյան
