13.12.2024 | 20:46
Վթար Ազատավան գյուղում. կան տուժածներ և զոհ
Սերժ Սարգսյանի հետ խնդիր չունեմ. Քոչարյան․ ՏԵՍԱՆՅՈՒԹ
Քաղաքականություն
28.09.2022 | 13:18
Տարբեր քաղաքական միավորների միջև հնարավոր չէ` լինեն այնպիսի հարաբերություններ, որ տարաձայնություններ չլինեն։ Այսօր հրավիրված ասուլիսի ժամանակ այս կարծիք հայտնեց ՀՀ երկրորդ նախագահ Ռոբերտ Քոչարյանը` անդրադառնալով ՀՀ երրորդ նախագահ Սերժ Սարգսյանի հետ հարաբերություններին և դիտարկմանը, որր ընդդիմությունը կոնսոլիդացված չէ։
«Հնարավոր չէ տարբեր քաղաքական ուժեր այնպես միավորել, որ ներքին հակասություններ չլինեն։ «Դիմադրության» շարժման ժամանակ ձեռք ձեռքի տված տարբեր կուսակցություններ են աշխատել, սակայն դա չի նշանակում, որ որոշակի տարաձայնություններ չեն ունեցել։ Համոզված եմ, որ իշխանության հետ առնչվող քաղաքական ուժերում նույնպես կան որոշակի անհամաձայնություններ»,- նշեց Քոչարյանը։
Հարցին, թե ինչու ընդդիմադիրների ակցիաների ժամանակ այդպես էլ մեկ հարթակի վրա չհայտնվեցին երկրորդ և երրորդ նախագահները՝ Քոչարյանը պատասխանեց, որ չպետք է սկսել «հին- նոր», «ղարաբաղցի-հայաստանցի» թեման մեջտեղ բերել։ Նրա խոսքով` հիմնական նպատակի համար, այո՛, հնարավոր է միասին լինել և պայքարել։
«Քաղաքական հարցերի՝ իշխանափոխության և այլ հարցելում Սերժ Սարգսյանի հետ որևէ խնդիր չունեմ։
Չենք հավաքվում ամեն օր, իրար հետ չենք խոսում, քեֆ, ուրախություն, հարսանիք, ծնունդ, թաղում չենք գնում, բայց այս է վիճակը, մի՛ փնտրեք ինչ-որ մի բան, որը կա՛մ չկա, կամ այն չափի չէ, ինչ ուզում եք տեսնել»,- ընդգծեց Քոչարյանը։
Հիշեցնենք՝ օրեր առաջ՝ սեպտեմբերի 22-ին հանդիպում էր տեղի ունեցել Ն․Ս․Օ․Տ․Տ․ Գարեգին Երկրորդ ամենայն հայոց կաթողիկոսի և ՀՀ նախագահներ Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի, ինչպես նաև ԼՂՀ նախագահներ Արկադի Ղուկասյանի և Բակո Սահակյանի միջև, որի ընթացքում, ըստ հաղորդագրության՝ կայացել էր «շահագրգիռ քննարկում Հայաստանում ստեղծված իրավիճակի առնչությամբ և որոշում էր կայացվել շարունակել հանդիպումները»։
Ավելի վաղ՝ «Մոսկվա» կինոթատրոնի կարմիր դահլիճում Ռոբերտ Քոչարյանը փակ հանդիպում էր ունեցել իր մի խումբ համախոհների հետ։
Մանրամասները՝ տեսանյութում։
