09.10.2026 | 21:27
ՀՀ-ն զգալի առաջընթաց է արձանագրել վիզաների ազատականացման ոլորտում․ ԵՄ գնահատման 2-րդ առաքելությունը ՀՀ-ում է
Թուրքիայի բոլոր բանկերը դադարեցրել են «Միր» քարտերի ընդունումը
Քաղաքականություն
28.09.2022 | 15:41
Թուրքիայում չեն մնացել բանկեր, որոնք ընդունում են «Միր» վճարային համակարգի քարտերը։ Այս մասին հայտնում է թուրքական NTV հեռուստաալիքը, գրում է Meduza-ն։
Հեռուստաալիքի տվյալներով՝ «Ziraat Bank», «Vakifbank» և «Halkbank» պետական երեք բանկերը հրաժարվել են աշխատել «Միր» համակարգի հետ: Մինչ այս, մասնավոր Isbank-ը և Denizbank-ը ևս դադարեցրել էին քարտերի ընդունումը։
Միաժամանակ, ՏԱՍՍ-ը հայտնում է, որ «Ziraat Bank»-ը և «Halkbank»-ը դեռ շարունակում են «Միր» քարտերով լիրայի տրամադրումը, որոնք թողարկվել են պատժամիջոցների տակ չգտնվող ռուսական բանկերի կողմից։
ՌԻԱ Նովոստիին էլ «Halkbank»-ից հայտնել են, որ մինչև օրվա վերջ սպասում են կարգավորող մարմնի պաշտոնական որոշմանը «Միր»-ի արգելման հետ կապված։
Օտարերկրյա բանկերը սկսեցին հրաժարվել «Միր» քարտերով աշխատել այն բանից հետո, երբ սեպտեմբերի կեսերին ԱՄՆ Ֆինանսների նախարարությունը սպառնացել էր պատժամիջոցներով այն ընկերություններին, որոնք օգնում են Ռուսաստանի իշխանություններին՝ օգտագործել «Միր» քարտերը ՌԴ-ից դուրս։
Հավելենք, որ Թուրքիայի նախագահ Ռեջեփ Թայիփ Էրդողանը սեպտեմբերի 23-ին կառավարության հետ խորհրդակցություն էր անցկացրել «Միր» քարտերի օգտագործման խնդրի հետ կապված։
Էմմա Չոբանյան
