Փաստ է, որ ՀՀ-ն կապիտուլյացիոն վիճակում է. իշխանության եկածները ձախողեցին ամեն ինչ. Սեյրան Օհանյան․ ՏԵՍԱՆՅՈՒԹ

«Փաստ է, որ Հայաստանի Հանրապետությունը կապիտուլյացիոն վիճակում է դեռ 2020 թվականի նոյեմբերի 9-ից, երբ ստորագրվեց եռակողմ հայտարարությունը»,- այս մասին «Եռաբլուր» զինվորական պանթեոնում լրագրողների հետ զրույցում հայտարարեց ՀՀ պաշտպանության նախկին նախարար, ԱԺ «Հայաստան» խմբակցության ղեկավար Սեյրան Օհանյանը` մեկնաբանելով Հանրային հեռուստաընկերության եթերում ՀՀ առաջին նախագահ Լևոն Տեր–Պետրոսյանի այն հայտարարությունները, թե Հայաստանին սպասվում են ծանր լուծումներ, ստորագրվելու է կապիտուլյացիայի պայմանագիր։

«Մենք մշտապես հպարտացել ենք մեր անկախությամբ, ինքնիշխանությամբ, ազատությամբ, բանակով, Արցախի ազատագրմամբ, ինչպես նաև պետականաշինությամբ։ Վերջին տարիների մեր պատմությունը ցույց տվեց, որ իշխանության են եկել մարդիկ, որոնք ձախողեցին ամեն ինչ` այդ թվում և բանակցային գործընթացը, 30 տարիների կատարած աշխատանքը․․․ Այդ ձախողումն էր, որ բերեց պատերազմի, ունեցանք զոհեր․․․ Մեր ցավն այն է, որ այսքան զոհերի պայմաններում պարտություն ենք ունեցել»,– նշեց Օհանյանը՝ հավելելով, որ այս իշխանությունը կապիտուլյացիայից հետո ամբողջությամբ տապալել է արտաքին քաղաքականությունը, տապալել է պաշտպանական քաղաքականությունը՝  բանակաշինությունը, պետական կառավարումը։

Օհանյանի դիտարկմամբ՝` երկրում ստեղծված իրավիճակից դուրս գալու տարբերակը միայն իշխանափոխությունն է։

Հիշեցնենք՝ ՀՀ առաջին նախագահ Լևոն Տեր-Պետրոսյանը Հանրայինին տված հարցազրույցում ասել է․ «Մեզ սպասում են ծանր լուծումներ, ցավոտ լուծումներ։ Պայմանագրեր պետք է ստորագրվեն և՛ Ադրբեջանի, և՛ Թուրքիայի հետ։ Դա ոչ մեկի քիմքին հաճո չի լինելու, բայց կա մի պահ, երբ այլընտրանք չկա»։

Մանրամասները՝ տեսանյութում։