17.05.2024 | 12:56
Գիշերը 3 մարզի լեռնային շրջաններում ձյուն է սպասվում
Փաշինյանն ու Մակրոնը բանակցություններից հետո հանդես են եկել համատեղ ասուլիսով․ ՏԵՍԱՆՅՈւԹ
Քաղաքականություն
26.09.2022 | 20:39
Ելիսեյան պալատում տեղի է ունեցել ՀՀ վարչապետ Նիկոլ Փաշինյանի հանդիպումը Ֆրանսիայի նախագահ Էմանուել Մակրոնի հետ։
Հանդիպումից հետո կողմերը հանդես են եկել մամուլի համար համատեղ հայտարարությամբ։ Նշելով, որ իրավիճակը հայ-ադրբեջանական սահմանին շարունակում է լարված մնալ՝ Էմանուել Մակրոնը կարևորել է ՀՀ սուվերեն տարածքից Ադրբեջանի զորքերի հետքաշումը։ Նա հիշեցրել է, որ ՀՀ-ի դեմ ադրբեջանական ագրեսիայի հարցը քննարկվել է ՄԱԿ-ի Անվտանգության խորհրդում։
Մակրոնը հայտարարել է, որ Փարիզը Հայաստանի և Ադրբեջանի միջև բանակցությունների վերականգնման կոչ է արել։
«Ուժի կիրառումը չի կարող լուծում լինել կողմերից ոչ մեկի համար, երկխոսությունը պետք է անհապաղ վերականգնվի։ Այն փաստը, որ Հայաստանի և Ադրբեջանի միջև սահմանը սահմանազատված չէ, չի կարող Հայաստանի տարածքի վրա ադրբեջանական զորքերի հարձակման համար արդարացում լինել։ Ադրբեջանական զորքերը պետք է վերադառնան ելման դիրքեր»,- մասնավորապես ասել է Ֆրանսիայի նախագահը։
Նա տեղեկացրել է նաև, որ առաջիկա ժամերին ծրագրում է հեռախոսազրույց ունենալ Ադրբեջանի նախագահ Իլհամ Ալիևի հետ։
Փաշինյանն իր հերթին շնորհակալություն է հայտնել Մակրոնին՝ ՄԱԿ-ի ԱԽ-ում հարցը քննարկման դնելու համար։ Նա նշել է, որ Հայաստանի դիրքորոշումը հստակ է՝ ադրբեջանական զորքերը պետք է դուրս գան ՀՀ ինքնիշխան տարածքից։ Փաշինյանը նաև կարևորել է ադրբեջանական ագրեսիայից տուժած ՀՀ տարածքներ միջազգային դիտորդական առաքելություն ուղարկելու հարցը։
Էմմա Չոբանյան
