Չավուշօղլուն հայտարարել է, թե Թուրքիայի քաղաքականությունը «նպաստում է կայունությանն ամբողջ աշխարհում», այդ թվում՝ Հարավային Կովկասում

Ժամանակակից աշխարհը կարելի է անվանել համաշխարհային քաղաքականության մեջ անորոշության շրջան։ Եվրոպայի կենտրոնում պատերազմը ցնցում է ուժերի հավասարակշռությունն աշխարհում, խորացնում առաջատար տերությունների միջև հակասությունները։ Այս մասին հայտարարել է Թուրքիայի ԱԳ նախարար Մևլութ Չավուշօղլուն Տոկիոյում  ճապոնական լրատվամիջոցների հետ հանդիպմանը, գրում է Անադոլու գործակալությունը։

«Թուրքիան այն բացառիկ երկրներից է, որը շարունակում է Ռուսաստանի հետ երկխոսությունը»,- ասել է նա՝ նշելով, որ Անկարան ինչպես Արևմուտքի, այնպես էլ Արևելքի հետ է։

Չավուշօղլուն նաև նշել է, որ Արևմուտքում կան դերակատարներ, որոնք հանդես են գալիս Ուկրաինայի պատերազմը շարունակելու օգտին։

«Այդ դերակատարները կարծում են, որ պատերազմի շարունակությունը կթուլացնի Ռուսաստանը։ Սակայն փաստն այն է, որ հիմնական վնասը կրում է Ուկրաինան»,- ասել է թուրք նախարարը։

Նա նշել է, որ Անկարայի քաղաքականությունը, իբր, նպաստում է կայունությանն ամբողջ աշխարհում։ Ըստ նրա՝ դրա վառ օրինակն են Թուրքիայի ջանքերը Լիբիայում, Բոսնիա և Հերցոգովինայում, Հարավային Կովկասում և Ուկրաինայում։ Չավուշօղլուն ասել է, թե «փափուկ ուժին» զուգահեռ՝ Թուրքիան օգատգործում է նաև կոշտ լծակներ։

«Օրինակ՝ Սիրիայում մենք ոչ միայն մարդասիրական օգնություն ենք ցուցաբերում կարիքավորներին, այլև վճռական պայքար ենք մղում ահաբեկչության դեմ»,- ասել է թուրք նախարարը՝ մոռանալով, սակայն, նշել, թե քանի ապօրինի ռազմական գործողություն է իրականացրել Թուրքիան վերջին տարիներին ոչ միայն Սիրիայում, այլև Իրաքում՝ ռմբակոծությունների ենթարկելով նաև խաղաղ բնակավայրերն ու քաղաքացիական բնակչությանը։

Էմմա Չոբանյան