Քաղաքականություն
22.09.2022 | 18:18
Իրանի նախագահ Էբրահիմ Ռաիսին ՄԱԿ-ի Գլխավոր վեհաժողովում ունեցած ելույթում հայտարարել է, որ Թեհրանը չի ձգտում միջուկային զենք ստեղծել։ Նա նաև պահանջել է ԱՄՆ-ի երաշխիքները, որ Վաշինգտոնը կհարգի ցանկացած նորացված միջուկային համաձայնագիր:
«Իրանի Իսլամական Հանրապետությունը չի ձգտում միջուկային զենք ստեղծել կամ ձեռք բերել, և նման զենքերը տեղ չունեն մեր դոկտրինում»,- ասել է Իրանի նախագահը, որին վկայակոչում է AFP-ն:
Ռաիսին ընդգծել է, որ իր երկիրը լրջորեն է վերաբերվում միջուկային ծրագրի սահմանափակման գործարքի վերականգնմանը, սակայն կասկածի է հայտնել՝ արդյո՞ք Թեհրանը կարող է վստահել Վաշինգտոնի հավատարմությանը ցանկացած հնարավոր համաձայնագրի նկատմամբ:
«Մեր ցանկությունը մեկն է՝ պարտավորությունների կատարումը»,- հայտարարել է Իբրահիմ Ռաիսին։
Նա նշել է, որ ԱՄՆ-ն է, որ դուրս է եկել համաձայնագրից, և հետաքրքրվել՝ արդյո՞ք Իրանը կարող է «իսկապես վստահել առանց երաշխիքների և հավաստիացումների», որ ԱՄՆ-ն այս անգամ կկատարի իր պարտավորությունները:
«Ամերիկան ոտնահարեց միջուկային գործարքը»,- ասել է Իրանի նախագահը։
Ռաիսին Արևմուտքի սահմանած պատժամիջոցներն անվանել է «պատիժ Իրանի ժողովրդի համար»։
Հիշեցնենք՝ 2015 թվականին Իրանը G6-ի (ԱՄՆ, Ռուսաստան, Չինաստան, Մեծ Բրիտանիա, Գերմանիա, Ֆրանսիա) հետ ստորագրել է Համատեղ համապարփակ գործողությունների ծրագիր (ՀԳՀԾ): Այն նախատեսում էր Թեհրանի նկատմամբ տնտեսական պատժամիջոցների փուլային վերացում՝ նրա միջուկային ծրագիրը սահմանափակելու դիմաց: 2018 թվականին ԱՄՆ-ը հայտարարեց համաձայնագրից դուրս գալու մասին։
Այս տարվա օգոստոսին Եվրամիությունը ներկայացրել է JCPOA-ի վերականգնման վերաբերյալ փաստաթղթի փոխզիջումային տարբերակը։
Տաթև Ֆռանգյան
