21.11.2024 | 16:52
ՌԴ-ից արձակված միջամայրցամաքային բալիստիկ հրթիռը միջուկային լիցք չի կրել․ AFP
Մոսկվա-Երևան ավիատոմսեր՝ 1 մլն դրամով․ ՌԴ-ում զորահավաքի լուրից հետո շատերը շտապում են լքել երկիրը․ ՏԵՍԱՆՅՈՒԹ
Քաղաքականություն
21.09.2022 | 20:55
Ռուսաստանում Պուտինը մասնակի մոբիլիզացիա է հայտարարել․ կզորակոչվի շուրջ 300 հազար պահեստազորային, առաջին հերթին նրանք, ովքեր արդեն ծառայություն են անցել զինված ուժերում, ունեն ռազմաուսումնական մասնագիտություն և համապատասխան փորձ։
Զորահավաքի մասին լուրը կայծակնային արձագանք գտավ․ հայտարարությունից րոպեներ անց արագ սպառվեցին սեպտեմբերի 21-ի բոլոր չվերթների ավիատոմսերը Մոսկվայից դեպի Երևան և Ստամբուլ։ Առաջիկա օրերի համար Մոսկվայից որոշ ուղղություններով տոմսեր արդեն չկան կամ կան՝ տարանցիկ չվերթներով ու շատ թանկ։
«Զվարթնոց» օդանավակայան ժամանող թե՛ ազգությամբ հայ, թե՛ ռուս քաղաքացիներից շատերն իսկապես տոմսերը հենց երեկ էին գնել։ Ոչ ոք սա չցանկացավ կապել զորահավաքի հետ, բայց ակնհայտ էր մեկ բան՝ ՌԴ քաղաքացիները, որ նախկինում մեր նկարահանումների ժամանակ սովորաբար ավելի պատրաստակամ էին հարցազրույցներ տալու առումով, այս անգամ հիմնականում խուսափում էին տեսախցիկից։
Մոսկվա-Երևան ավիատոմսերն առաջիկա օրերի համար նաև կտրուկ թանկացել են․ Aviasales.ru-ի այսօրվա ժամը 13։20-ի տվյալներով՝ սեպտեմբերի 23-ի համար նախատեսված Մոսկվա-Երևան ուղիղ միակողմանի չվերթի տոմսն արժեր շուրջ 860 հազար դրամ։ Սեպտեմբերի 24-ին ուղիղ չվերթների գները սկսվում են շուրջ 343 հազար դրամից ու հասնում 700 հազար դրամի։
Ավելի մատչելի տոմսեր կան սեպտեմբերի վերջին օրերի թռիչքների համար։ Սեպտեմբերի 28-ին Մոսկվա-Երևան ուղիղ չվերթների գները տատանվում են 70 հազարից դրամից մինչև 200 հազար դրամի սահմանում։ Տոմսերի առցանց գներն անընդհատ փոփոխվում են, հետևաբար, երկարաժամկետ կտրվածքով ընդհանրացումներ այս պահին հնարավոր չէ անել։
Ուշագրավ է, որ Երևան-Մոսկվա ավիատոմսերն առաջիկա օրերի համար անհամեմատ ավելի մատչելի են։ Օրինակ՝ սեպտեմբերի 23-ի չվերթների տոմսերը վաճառվում են՝ սկսած 90 հազար դրամից։
Պահեստազորայինների զորահավաք հայտարարելուց հետո ՌԴ իշխանությունները կարող են արգելել դուրս գալ Ռուսաստանից, բայց միայն ծանուցում ստանալուց հետո։
Ընդ որում, ՌԴ Դաշնային խորհուրդը հավանություն է տվել մոբիլիզացիայի ընթացքում և զինված հակամարտության համատեքստում զինվորական ծառայության դեմ ուղղված հանցագործությունների խստացմանը, գրում է ռուսական «Մեդուզա»-ն։
Ռազմական գործողություններին մասնակցելուց հրաժարվելու համար օրենքը նախատեսում է մինչև երեք տարվա ազատազրկում, իսկ եթե նման մերժումը հանգեցրել է «լուրջ հետևանքների»՝ մինչև 10 տարի ժամկետով ազատազրկում։
Ռուսաստանում այսօր նաև «Վեսնա» երիտասարդական շարժումը կոչ է արել դուրս գալ ցույցերի՝ ընդդեմ մոբիլիզացիայի։
Հիշեցնենք, որ Ուկրաինայի դեմ փետրվարին սանձազերծած պատերազմից հետո մեծ թվով Ռուսաստանի քաղաքացիներ, դատապարտելով պատերազմն ու համաձայն չլինելով Պուտինի վարած քաղաքականության հետ, լքեցին երկիրը։ Շատերը հենց Հայաստան ժամանեցին։ Այս տարվա առաջին 6 ամիսներին ՌԴ քաղաքացու անձնագրով շուրջ 40․000 անձ է Հայաստան եկել և մնացել այստեղ։
Մանրամասները՝ տեսանյութում։
Սաթենիկ Հայրապետյան
