08.06.2026 | 06:41
Ամփոփվել են 1283 ընտրատեղամասերից ստացված նախնական արդյունքները. ԿԸՀ
Բնակիչների մի մասը տեղափոխվել է պաշտպանական վայրեր. մարդկային կորուստներ չունենք. Վայոց ձորի մարզպետ․ ՏԵՍԱՆՅՈՒԹ
Հասարակություն
16.09.2022 | 14:22
Ջերմուկ քաղաքում այս օրերին բնակչության տեղահանման և տարհանման հետ կապված բոլոր միջոցառումները պատշաճ ձևով իրականացվել են: Այս մասին ՀՀ-ում հավատարմագրված դիվանագիտական կորպուսի ներկայացուցիչների հետ հանդիպմանն ասաց Վայոց ձորի մարզպետ Արարատ Գրիգորյանը:
Նրա խոսքով` բնակիչների մի մասը տեղափոխվել է պաշտպանական վայրեր՝ ապաստարաններ և այլն, իսկ մյուս մասը տեղափոխվել է մոտակա անվտանգ տարածքներ:
«Հնարավոր բոլոր միջոցառումներն իրականացվել են, որպեսզի քաղաքացիները լինեն ապահով: Մենք չէինք սպասում, որ պետք է հարվածներ հասցվեն Ջերմուկ քաղաքի քաղաքացիական և այլ ենթակառուցվածքներին, դրա համար անակնկալի ենք եկել»,- ասաց նա՝ հավելելով, որ Ջերմուկի քաղաքացիական բնակչության շրջանում որևէ կորուստ չի գրանցվել:
«Այս պահին Ջերմուկի վտանգավոր գոտում քաղաքացիական անձինք չկան»,-հավելեց մարզպետը:
Նշենք, որ Ջերմուկում են 30 երկրների դիվանագիտական ներկայացուցիչներ, արձանագրում են ադրբեջանական ագրեսիայի հետևանքները։
Հայաստանում հավատարմագրված դեսպանների ու միջազգային կազմակերպությունների ղեկավարների Ջերմուկ այցին չի մասնակցում ՀՀ-ում ՌԴ դեսպան Սերգեյ Կոպիրկինը։ Նրա փոխարեն դեսպանատնից ներկա է մեկ այլ ներկայացուցիչ։
Մանրամասները՝ տեսանյութում։
