03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
ՀԱՊԿ նիստում որոշումներ են կայացվել. ըստ Արմեն Գրիգորյանի՝ հայկական կողմը ռազմական աջակցություն է ակնկալում
Քաղաքականություն
14.09.2022 | 20:27
ՀԱՊԿ Հավաքական անվտանգության խորհրդի՝ երեկ անցկացված նիստում որոշումներ են կայացվել, և հայկական կողմը հույս ունի, որ դրանք արագ իրականություն կդառնան։ Հանրային հեռուստաընկերության եթերում այս մասին հայտարարեց ՀՀ Անվտանգության խորհրդի քարտուղար Արմեն Գրիգորյանը՝ խոսելով հայկական կողմի՝ այդ կառույցից ունեցած ակնկալիքներից։
Նա, սակայն, կայացված որոշումների մասին մանրամասներ չհայտնեց։
Արմեն Գրիգորյանի փոխանցմամբ՝ հայկական կողմը ռազմական աջակցություն է ակնկալում ՀԱՊԿ-ից, և քննարկման ժամանակ հարցը հենց այդպես է ձևակերպվել։
«Հայաստանն ակնկալում է բավարար ռազմական և ռազմաքաղաքական օգնություն, որպեսզի Ադրբեջանի զորքերը դուրս բերվեն ՀՀ սուվերեն տարածքից»,- ընդգծեց պաշտոնյան։
«Թիրախավորված են ինչպես Հայաստանի Զինված ուժերը, քաղաքացիական ենթակառուցվածքները, այնպես էլ Ռուսաստանի Զինված ուժերը»,- նշեց Գրիգորյանը՝ ակնարկելով այսօր ռուս սահմանապահների տեղակայման շենքին հասցված հարվածները:
Արմեն Գրիգորյանը նաև հայտարարեց, որ Ադրբեջանի նպատակն է՝ ներխուժել և գրավել ՀՀ ինքնիշխան տարածքը։
Շողիկ Գալստյան
