11.12.2024 | 13:22
Երիտասարդական մայրաքաղաքի խորհրդանշական բանալին Գավառից փոխանցվել է Ապարանին
Տրանսպորտի նախարարն ընդունել է Ֆրանկոֆոնիայի գագաթաժողովի տեխնիկական հարցերի կազմակերպման պատասխանատուներին
24.05.2018 | 13:14
Ֆրանկոֆոնիայի միջազգային կազմակերպության 17-րդ գագաթաժողովն այս տարի կանցկացվի Հայաստանում. տեղեկացնում է ՀՀ տրանսպորտի, կապի և տեղեկատվական տեխնոլոգիաների նախարարությանլրատվական ծառայությունը:
Գագաթաժողովի տեխնիկական հարցերի նախապատրաստման շրջանակներում ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանն ընդունեց «Աժանս Փաբլիք» խորհրդատվական գործակալության պատվիրակության անդամներին, ովքեր պատասխանատու են գագաթաժողովի տեխնիկական հարցերի կազմակերպման համար:
Հանդիպմանը ներկա էին նաև հայաստանյան բջջային կապի օպերատորների ներկայացուցիչներ։
Ողջունելով գագաթաժողովի անցկացումը Հայաստանում՝ նախարարն ընդգծեց դրա մեծ կարևորությունը մեր երկրի և հասարակության համար։ Նա նշեց, որ նախարարությունն արդեն իսկ կատարել է որոշակի աշխատանքներ և այսուհետ ևս պատրաստակամ է ջանք չխնայել գագաթաժողովի նախապատրաստական աշխատանքները բարձր մակարդակով կազմակերպելու և անցկացնելու համար։
Ծրագրի պատասխանատու Ֆլորան դը Շանտերան ներկայացրեց կազմակերպչական մի շարք մանրամասներ։
Նշվեց, որ հոկտեմբերին Հայաստանում անցկացվող այս կարևոր միջոցառմանը ներկա կլինեն 50 երկրների ղեկավարներ և պատվիրակություններ, 800-ից ավելի լրատվամիջոցների ներկայացուցիչներ։ Գագաթաժողովը կլուսաբանվի եվրոպական, աֆրիկյան հայտնի հեռուստաընկերությունների կողմից։ Նախապատրաստական աշխատանքներում նա հատկապես կարևորեց հզոր և կայուն ինտերնետ կապի անհրաժեշտությունն ու հասանելիությունը, ինչպես նաև բարձրորակ հեռուստահեռարձակման ապահովվածությունը։
Քննարկման արդյունքում պայմանավորվածություն ձեռք բերվեց ձևավորել աշխատանքային խումբ, որը գագաթաժողովի անցկացման վայրում կուսումնասիրի տեխնիկական բոլոր հնարավորությունները և կառաջարկի կապի ապահովման առավելագույն պայմանները։
