Կարևոր է հստակ հասկանալ՝ մեր նկատմամբ ով ինչ պարտավորություններ ունի․ Փաշինյան․ ՏԵՍԱՆՅՈՒԹ

Արդյոք սա է խաղաղության օրակարգի արդյունքը և արդյոք այն, ինչ տեղի է ունենում, խաղաղության օրակարգի ձախողում չէ: Այսօր ԱԺ-ում իր ելույթում այս հարցադրմանն անդրադարձավ Նիկոլ Փաշինյանը՝ անդրադառնալով Ադրբեջանի հարձակմանը։

«Մենք բազմիցս ենք ասել, որ որդեգրելով խաղաղության օրակարգ, նաև հասկանում ենք, որ դա միայն մի սուբյեկտից կախված չէ, և ընդհակառակը, այս գործողություններով Ադրբեջանն ուզում է, և փաստացի տորպեդահարում է խաղաղության օրակարգը, որովհետև խաղաղությունն այն միջավայրն է, որտեղ Հայաստանը կարող է զարգանալ մեծ տեմպերով, և կարող է ապահովել Հայաստանի ու ԼՂ անվտանգությունը»,- նշեց վարչապետը։

«Ադրբեջանի ներկայացուցիչները ևս հայտարարում են, որ խաղաղություն են ուզում: Մենք էլ ենք ասում, որ խաղաղություն ենք ուզում։ Այդ դեպքում ո՞վ է, որ իր հայտարարություններում անկեղծ չէ և չի արտահայտում իր իսկական ցանկություններն ու մղումները։

Պետք է վերահաստատեմ, որ բոլորն ուզում են խաղաղություն, խնդիրն այն է, որ յուրաքանչյուր սուբյետ, խաղաղություն ասելով, հասկանում է պայմանների որոշակի խումբ, հասկանում են իրենց պատկերացումը խաղաղության մասին: Խաղաղությունը տեղի չի ունենում, երբ պատկերացումները չեն համընկնում:

Մենք պետք է գնանք այս ճանապարհով․ պետք է բոլոր հնարավոր միջոցներով պաշտպանենք ՀՀ տարածքային ամբողջականությունը, ինքնիշխանությունը, ձգտենք խաղաղության՝ փորձելով մոտեցնել պատկերացումները, և պետք է հնարավորինս արագ և արդյունավետ բարեփոխենք մեր բանակը՝ ՀՀ անվտանգությունը ապահովելու համար։

Եվ իհարկե մեր դաշնակցային հարաբերություններում մեխանիզմների, պարտավորությունների կատարելագործումը չափազանց կարևոր է այս համատեքստում: Շատ կարևոր է հստակ հասկանալ, թե մեր նկատմամբ ով ինչ պարտավորություն ունի, և մենք ուրիշների նկատմամբ ինչ պարտավորություններ ունենք»,- նշեց Փաշինյանը

Մանրամասները՝ տեսանյութում։