Ժողովրդի վստահությունը վայլելող կառավարության դեմ սաբոտաժի գործողություններ անելը նշանակում է սաբոտաժի գործողություններ անել ժողովրդի, ՀՀ-ի նկատմամբ․ Նիկոլ Փաշինյան

Այսօր ՏՏ ոլորտի ներկայացուցիչներին այցելած ՀՀ վարչապետ Նիկոլ Փաշինյանը պատասխանեց լրագրողների հարցերին։ ԱԺ նորընտիր պատգամավոր Ալեն Սիմոնյանի՝ մանդատը վայր դնելու և նրան Երևանի քաղաքապետի պաշտոնում տեսնելու մասին լրագրողներից մեկի հարցին, վարչապետ Նիկոլ Փաշինյանն այսօր կարճ պատասխանեց․ «Այս պահին որևէ բան ասել չեմ կարող»։

Վարչապետին հարց ուղղեցին Ժիրայր Սեֆիլյանի բաց նամակի մասին, որում նա նշել էր, որ քաղբանտարկյալներին ազատ չարձակելը վտանգավոր հետևանքներ կունենա և տպավորություն է, որ Փաշինյանն այդ հարցով ձեռքերը լվացել է։ Վարչապետը նախ ասաց, որի չի հասկանում, թե ինչ է նշանակում ձեռքերը լվանալ, ապա նշեց, որ չի կարելի բռնության սպառնալիքով խոսել ժողովրդի հետ․ «Եթե արձանագրվել է քաղաքական իրողության փոփոխություն, ապա այդ փոփոխությունը պետք է արձանագրվի բոլորի մոտ»։

Նա նաև հավելեց, որ հնարավոր սաբոտաժները ներկայիս կառավարության դեմ չեն, այլ ժողովրդի․ «Երբ դատարաններին հրահանգ տալու գործընթաց լինի, դա կդառնա սերժսարգսյանականացման գործընթաց։ Երբ մեկ անգամ դատարանին հրահանգ տանք, նրանք այլևս չեն կարողանա ինքնուրույն որոշումներ կայացնել։ Ես ասում եմ, եթե անհնազանդության ակցիաները կատարվում են հեղափոխության անունից, ապա պետք է դադարեցվեն և մարդիկ աշխատեն իրենց կառավարության հետ, իսկ եթե դա կատարվում է սաբոտաժի նպատակով, ուրեմն ժողովրդի վստահությունը վայլելող կառավարության դեմ սաբոտաժի գործողություններ անելը նշանակում է սաբոտաժի գործողություններ անել Հայաստանի Հանրապետության ժողովրդի, Հայաստանի Հանրապետության նկատմամբ։ Սիրո և հանդուրժողականության մթնոլորտը որևէ մեկը թող չփորձի մեկնաբանել որպես թուլության մթնոլորտ, դա շատ վտանգավոր մեկնաբանություն է»,- ասաց Փաշինյանը։

Մանրամասները՝ տեսանյութում։