28.06.2026 | 18:02
Չկա որևէ ուժ, որը վիճարկած լինի հրապարակված տեսագրությունները․ ՀԿԿ ներկայացուցիչ. ՏԵՍԱՆՅՈւԹ
Գարեգին Բ-ի հետ հանդիպմանը Մխիթար Հայրապետյանը քննարկել է 2018 թ. Ամենայն Հայոց Կաթողիկոսի կողմից Երիտասարդության տարի հռչակման շրջանակներում իրականացվող ծրագրերը
22.05.2018 | 19:51
Մայիսի 22-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Հայաստանի Հանրապետության Սփյուռքի նախարար Մխիթար Հայրապետյանին. տեղեկացնում են ՀՀ սփյուռքի նախարարության լրատվական ծառայությունը:
Վեհափառ Հայրապետը նորանշանակ նախարարին մաղթեց արդյունավետ աշխատանք կարևոր և պատասխանատու այդ հանձնառության մեջ:
Նորին Սրբությունն անդրադարձ կատարեց անցնող տարիների ընթացքում նախարարության և Մայր Աթոռի կառույցների միջև ձևավորված սերտ գործակցությանը` համոզմամբ, որ տարբեր ծրագրերի շրջանակներում այն պիտի շարունակվի: Գարեգին Բ Կաթողիկոսն ընդգծեց, որ Հայոց Եկեղեցին, միշտ կամուրջ հանդիսանալով Հայաստանի և Սփյուռքի միջև, ջանացել է ազգային ինքնության ու հայապահպանությանն ուղղված ծրագրերով զորացնել աշխարհասփյուռ հայության կապը Հայրենիքի հետ և ամրապնդել միասնականության ոգին:
Իր հերթին Սփյուռքի նախարարը ներկայացրեց ոլորտի առաջնահերթությունների վերաբերյալ իր տեսլականը` հատկապես առանձնացնելով հայպահպանությունն ու հայրենադարձությունը: Մխիթար Հայրապետյանը նշեց, որ հիշյալ հարցերում չի պատկերացնում աշխատանքն առանց Հայ Եկեղեցու հետ համագործակցության:
Հանդիպմանը խոսվեց նաև 2018 թ. Ամենայն Հայոց Կաթողիկոսի կողմից Երիտասարդության տարի հռչակման շրջանակներում իրականացվող ծրագրերի, մասնավորապես՝ Սփյուռքի տարբեր համայնքներից ակնկալվող հայ երիտասարդների այցելությունների մասին:
