27.07.2026 | 23:18
Ոստիկանները ձերբակալել են ապօրինի զենք պահող տղամարդուն
ՄԱԳԱՏԷ-ի մասնագետները ժամանակավորապես մնացել են Զապորոժիեի ԱԷԿ-ում
Քաղաքականություն
02.09.2022 | 13:08
Ատոմային էներգիայի միջազգային գործակալությունը (ՄԱԳԱՏԷ) իր ներկայացուցիչներին կթողնի Զապորոժիեի ԱԷԿ-ում։ Այս մասին հայտարարել է ՄԱԳԱՏԷ-ի ղեկավար Ռաֆայել Գրոսսին ռուսական զորքերի կողմից օկուպացված Էներգոդարի կայան կատարած այցից հետո, գրում է VOA-ն։
I am finishing my first visit to #Ukraine’s #Zaporizhzhya Nuclear Power Plant.@IAEAorg is here to stay and will maintain a continued presence at #ZNPP. pic.twitter.com/k4zO3IMe2I
— Rafael MarianoGrossi (@rafaelmgrossi) September 1, 2022
Գրոսսին ասել է, որ փորձագետներն այսօր՝ առաքելության առաջին ժամերին, «հասցրել են հավաքել շատ կարևոր տեղեկատվություն», նա տեսել է «առանցքային բաներ, որոնք ցանկանում էր տեսնել»։
Գործակալության ղեկավարը մանրամասներ չի հայտնել, սակայն նշել է, որ առաքելությունն Էներգոդարում կմնա մինչև սեպտեմբերի 3-ը, իսկ հետո կորոշվի ՄԱԳԱՏԷ-ի դիտորդների մշտական ներկայության հարցը։ Գրոսսին ընդգծել է նաև կայանի անձնակազմի անձնուրաց աշխատանքը։
«Չնայած ծանր իրավիճակին և հանգամանքներին՝ նրանք շատ պրոֆեսիոնալ են իրենց աշխատանքում»,- լրագրողներին ասել է գործակալության ղեկավարը։
Ռաֆայել Գրոսսին արդեն հեռացել է ատոմակայանից։ Վերջին տվյալներով՝ ՄԱԳԱՏԷ-ի առաքելության ավտոշարասյան ինը մեքենաներից չորսը լքել են ատոմակայանը։
ՄԱԳԱՏԷ-ի առաքելության՝ Զապորոժիեի ԱԷԿ կատարած այցի օրը տարածաշրջանից տեղեկություններ են ստացվել Էներգոդարի հրթիռակոծման մասին։ Քաղաքի ուկրաինացի քաղաքապետ Դմիտրի Օռլովը հարձակումների համար մեղադրել է ռուսական բանակին։ Ռուսաստանի կողմից նշանակված Էներգոդարի իշխանությունները պնդում են, որ սեպտեմբերի 1-ի առավոտյան ուկրաինական հրետանին հարվածել է քաղաքին։
Ռուսական զորքերը գրավել են Զապորոժիեի ատոմակայանը Ուկրաինա ներխուժումից անմիջապես հետո՝ 2022 թվականի մարտին։ Այդ ժամանակվանից Կիևն ու Մոսկվան բազմիցս միմյանց մեղադրել են ատոմակայանի հարակից տարածքը գնդակոծելու մեջ։ Օգոստոսի սկզբին ՄԱԳԱՏԷ-ն հայտարարել է, որ Զապորոժիեի ԱԷԿ-ում անվտանգության արձանագրությունները զանգվածաբար խախտվել են։
Տաթև Ֆռանգյան
