Քաղաքականություն
22.05.2018 | 10:46
Հանդես գալով Վաշինգոնի «Ժառանգություն» հիմնադրամում`ԱՄՆ-ի փոխնախագահ Մայք Փոմփեոն ներկայացրել է պահանջների մի ցանկ, որոնք ըստ Վաշինգտոնի, պիտի ներառվեն Իրանի հետ 2015 թվականին կնքված միջուկային գործարքում: Անհամաձայնության դեպքում, Վաշինգտոնը սպառնում է խիստ պատժամիջոցներով. փոխանցում է VOA-ն:
Փոմփեոն ներկայացրել է Իրանի հետ միջուկային գործարքում նոր պահանջների մի ցանկ, եւ սպառնացել, որ իր վարքագծում փոփոխություններ չիրականացնելու դեպքում Իրանը կհայտնվի իր տնտեսության համար կործանարար պատժամիջոցների ներքո:
Հիշեցնենք, որ այս ամսվա սկզբին էր նախագահ Թրամփն իր երկիրը դուրս բերել Իրանի հետ կնքված միջուկային գործարքից:
Որեւէ նոր գործարք կնքելու դեպքում, ըստ Փոմփեոյի, Իրանը պիտի անորոշ ժամանակով հրաժարվի միջուկային զենքերի ուղղությամբ իրականացվող բոլոր գործողություններից, ավարտի բալիստիկ հրթիռների արտադրությունը եւ դադարեցնի Մերձավոր Արեւելքում իր «ապակայունացնող գործունեությունը»:
«ԱՄՆ-ը պիտի վստահ լինի, որ Իրանը երբեք չի ունենա միջուկային զենք կրելու կարողություն», ասել է Փոմփեոն:
Եթե Իրանը չփոխի իր դիրքորոշումը, Միացյալ Նահանգները ‘’ուժի մեջ կդնի ֆինանսական աննախադեպ ճնշամիջոցներ’’, հայտարարել է Փոմփեոն:
Նրա խոսքերով, «Դա կլինի պատմության մեջ մինչ այժմ իրականացված ամենախիստ պատժամիջոցը:
Իրանը, որը տարիներ շարունակ կռիվներ է մղել Մերձավոր Արեւելքում, պատժամիջոցների կիրառման դեպքում ստիպված կլինի կռիվ տալ տնտեսությունը փրկելու համար»:
Իրանը պիտի դադարեցնի գործունեությունը Մերձավոր Արեւելքում, «որը մտահոգության մեծ խնդիր է ԱՄՆ-ի դաշնակիցների համար», ասել է ԱՄՆ-ի պետքարտուղարը: Նա ասել է, որ Իրանը պիտի դադարեցնի աջակցությունը Եմենի հութի ապստամբներին, հետ քաշի իր բոլոր ուժերը Սիրիայից, դադարեցնի աջակցությունը Հեզբուլլահին եւ վերջ տա Իսրայելի նկատմամբ սպառնալիքներին:
Թրամփի վարչակազմը խոստացել է վերսկսել այն պատժամիջոցները, որոնք դադարացվել էին 2015-ին Իրանի հետ միջուկային միջազգային պայմանագրի ստորագրումից հետո: Հիշեցնենք, որ Իրանի հետ պայմանագիրը ստորագրել էին ԱՄՆ-ը եւ եվրոպական մի շարք երկրներ: Վերջիններս այս պահին բանակցություններ են անցկացնում Իրանի հետ` փորձելով փրկել գործարքը, սակայն դեռեւս պարզ չէ, թե ինչ հաջողություն կունենան բանակցությունները:
Իրանի արտաքին գործերի նախարար Ջավադ Զարիֆն ասել է, թե «միջուկային համաձայնագրի շուրջ Եվրոպական միության քաղաքական աջակցությունը բավարար չէ»:
Փոմփեոն ասել է նաեւ, որ Իրանը կարող է սպասել ԱՄՆ-ի կողմից վճռական զիջումների, եթե «համաձայնվի իրականացնել մեծ փոփոխություններ»:
Ինչպես փորձագետներն են ասում, հստակ չէ նաեւ, թեառանց եվրոպական ընկերությունների մասնակցության, որքան արդյունավետ եւ խիստ կարող են լինել ԱՄՆ-ի ֆինանսական պատժամիջոցները:
