06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
«Ինչ արժե Սեպտեմբերի 1-ը»․ ուսումնական տարվա մեկնարկը՝ ֆինանսական նոր բեռ անապահովների համար․ ՏԵՍԱՆՅՈՒԹ
Հասարակություն
29.08.2022 | 19:03
Մի քանի օրից սեպտեմբերի 1-ն է․ ուսումնական տարվա մեկնարկը դպրոցահասակ երեխա ունեցողների համար նոր ծախսերի ժամանակահատված է: Հագուստ, կոշիկ, պայուսակ, գրենական պիտույքներ․ երեխային դպրոց ուղարկելու համար անհրաժեշտ ապրանքների ցուցակը մեծ է։ Factor TV-ն զրուցել է գնորդների ու վաճառողների հետ՝ պարզելու, թե որքան է կազմում մեկ դպրոցական երեխայի՝ ուսումնական տարվա մեկնարկին նախապատրաստելու բյուջեն։
Կինը, որ ներկայանալ չցանկացավ, դպրոցահասակ երկու տղա ունի։ Ասաց՝ նրանց նորմալ դպրոց ճանապարհելու համար 100․000 դրամը չի բավականացնի, միայն պայուսակ, հագուստ, կոշիկ միգուցե կկարողանա գնել, բայց գրենական պիտույք՝ ոչ։ «Թանկացումներ կան, իհարկե»,- ասաց նա։
Դպրոցահասակ երկու երեխա ունեցող մեկ այլ ծնող էլ ասաց, որ նրանց դպրոց ճանապարհելու համար 200․000-ից էլ շատ գումար է անհրաժեշտ, դա դեռ բավական չէ, հաճախ դպրոցն է որոշում, թե երեխան ինչ պետք է հագնի, ինչը լրացուցիչ ծախս է ենթադրում։ Առևտրականներն իրենք էլ չեն հերքում՝ նախորդ տարիների համամատ թանկացումներ կան, բայց առևտրի ծավալներից չեն դժգոհում։
«Իրազեկ և պաշտպանված սպառող» ՀԿ նախագահ Բաբկեն Պիպոյանի դիտարկմամբ Հայաստանում գնաճը գերազանցում է նորման։ «Ունենք սեզոնով պայմանավորված գնաճ, որը ձևավորվում է առաջարկ-պահանջարկով»,- ասաց փորձագետը։
Սեպտեմբերի մեկից հետո նշված ապրանքների գները հնարավոր է նվազեն, բայց Պիպոյանն ասում է, այնուամենայնիվ, նախորդ տարվա համեմատ գնաճային ֆոնը կպահպանվի։ Սպառողների իրավունքների պաշտպանությամբ զբաղվող փորձագետը դպրոցահասակ երեխա ունեցողներին խորհուրդ է տալիս գոնե գրենական պիտույքները սկզբում գնել քիչ քանակությամբ՝ այսինքն՝ այնքան, որքան տվյալ պահին պետք է լինելու, իսկ լիարժեք գնումներ կարելի է կատարել սեպտեմբերի 2-րդ կամ 3-րդ շաբաթում։
Մանրամասները՝ տեսանյութում։
Արփի Հակոբյան
