Ադրբեջանական կողմն ունակ չէ նստելու բանակցությունների սեղանի շուրջ․ Թևան Պողոսյան. ՏԵՍԱՆՅՈՒԹ

«Մի բան պետք է գիտակցել, որ մեր թշնամին ամենաքիչն է հետաքրքրվում, թե ինչ գործընթացներ են տեղի ունենում մեզ մոտ, իրենց խնդիրն այդ գործընթացներից օգտվելն է։ Առջևում մայիսի 28-ն է, երբ Ադրբեջանը փորձելու է աշխարհին ապացուցել, որ իրենք 100 տարեկան են, օրացույցում ունենք օրեր, երբ Ադրբեջանը այսպես, թե այնպես ակտիվություն է ցուցաբերելու։ Տրանսֆորմացիոն շրջան է և կարող է ինստիտուտներն այնպես չաշխատեն, թշամին փորձելու է օգտվել իրավիճակից, մենք պետք է հասկանանք, թե ինչ անել, որպեսզի նրանք չկարողանան օգտվել այս եղած իրավիճակից, ի վերջո, նոր մարդիկ են նշանակվել, համակարգեր են փոխվում, մի տեղ ադմինիստրացիաները այսպես կաշխատեն, այնպես չեն աշխատի, Ադրբեջանը փորձելու է իր հնարավորությունների մեջ տեսնել՝ ինչ կարող է անել»,- այսօր լրագրողների հետ հանդիպմանն ասաց «Մարդկային զարգացման միջազգային կենտրոնի» ղեկավար, օրերս ՀՀ նախագահի խորհրդական նշանակված Թևան Պողոսյանը։

Բանախոսն անդրադարձավ նաև Արցախը բանակցությունների կողմ դարձնելու Նիկոլ Փաշինյանի հայտարարությանը, ասելով, որ վաղ թե ուշ դա տեղի է ունենալու: «Այդ մասին համանախագահները մեկ անգամ չէ, որ ասել են, Կազանից առաջ էլ են ասել, հետո էլ, բոլորը գիտակցում են, որ ֆորմատը պետք է այդպիսին լինի։ Փաշինյանի խոսքերը կարելի է այսպես մեկնաբանել՝ եթե Ադրբեջանն ուզում է հարցը խաղաղ բանակցային մթնոլորտում լուծել, ապա պետք է Արցախը դառնա բանակցությունների կողմ, եթե ոչ՝ ուրեմն ռազմականից բացի այլ պատկերացում չունի»,- նշեց նա, արձանագրելով, որ դատելով ադրբեջանական կողմի արձագանքներից, նրանք պատրաստ չեն հարցի խաղաղ լուծմանը։

Մանրամասները՝ տեսանյութում։