Հայաստանի գոյության իմաստը իր տարածքում հայկական ներուժի կենտրոնացումն ու դրա անվտանգությունն ու բնականոն զարգացումն ապահովելն է. Նիկոլ Փաշինյան

Լոս Անջելեսում տեղի ունեցած Հարավային Կալիֆոռնիայի համալսարանի Հայկական ուսումնասիրությունների ինստիտուտի «Հայաստանը վաղը․ քաղաքացիական դիվանագիտությունը՝ գործողության մեջ» քննարկմանը տեսակապով միացել է ՀՀ վարչապետ Նիկոլ Փաշինյանը, որը հայտարարել է՝ Հայաստանի Հանրապետության գոյության իմաստը իր տարածքում հայկական ներուժի կենտրոնացումն ու դրա անվտանգությունն ու բնականոն զարգացումն ապահովելն է:

«Մեր խնդիրը մեր ժողովրդի արտագաղթի գործընթացը կանգնեցնելն է, Հայաստանը դարձնել մի պետություն, որը նպատակաուղղված է հայության ներուժի պահպանմանն ու նրա բնականոն գործունեության ապահովմանը: Դրա համար մի նախապայման կա, ՀՀ քաղաքացին պետք է լինի բարձրագույն իշխանություն կրողը, ՀՀ քաղաքացին պետք է որոշի, թե ով լինի կառավարությունը և ով դադարի լինել կառավարություն»,- ասել է ՀՀ վարչապետը:

Ըստ Փաշինյանի, Հայաստանի սխալ ընթացքն սկսվել է այն պահից, երբ սկսել է կիրառվել ընտրությունների կեղծման համակարգը, հետևաբար նոր ձևավորված կառավարության կարևորագույն խնդիրն է վերականգնել ազատ, անկախ ու թափանցիկ ընտրությունների ինստիտուտը, որպեսզի ընտրությունների արդյունքները կասկածի տակ չդրվեն որևէ մեկի կողմից:

Սփյուռքի և Հայաստանի կապի վերաբերյալ վարչապետը նշել է, որ այստեղ ներգրավվածության խնդիրը սահմանադրությամբ է կանոնակարգվում. «Սահմանադրությամբ ասվում է, որ օրինակ, նախարար կարող է նշանակվել այն մարդը, ով վերջին 4 տարում եղել է միայն ՀՀ քաղաքացի ու 5 տարի մշտապես բնակվել է ՀՀ-ում: Մենք կարծում ենք, որ այս կարգավորումը չի արտահայտում մեր ազգային ձգտումները և այն ստեղծում է արհեստական խոչընդոտներ սփյուռքի ներգրավվածության համար: Մենք մտադիր ենք այս արգելքները վերացնել, որպեսզի սփյուռքի ներուժը հնարավորություն ունենանք օգտագործել պետական ինստիտուտների կայացման գործում»,- շեշտադրում է արել Փաշինյանը:

Նույնանուն քննարկմանը միացել է նաև ՀՀ նախագահ Արմեն Սարգսյանը, որը հարցին թե ինչ հնարավորություններ կստեղծի այս հեղափոխությունը, ասել է, որ ամենակարևոր հնարավորությունն այն է, որ Երիտասարդները գիտակցեցին , որ իրենք են իրենց երկրի տերը, տերը հնարավորությունների և ժառանգության, նրան ենք տերը այս երկրի ապագայի և ամենակարևոր հնարավորությունը որ այս հեղափոխությունը ընձեռեց դա քաղաքացի լինելու, պատասխանատու լինելու հնարավորությունն է։